தேர்தல் காலகட்டத்தில் தலைவர்கள் கட்சி விட்டு கட்சி தாவுவது வழக்கம். கடந்த சில தினங்களுக்கு முன் கொல்லம் மாவட்டம் கொட்டாரக்கரையை சேர்ந்த முன்னாள் எம்எல்ஏவும், மார்க்சிஸ்ட் கம்யூனிஸ்ட் மூத்த பெண் தலைவருமான ஐஷா போற்றி காங்கிரசுக்குத் தாவியது கேரள அரசியலில் பரபரப்பை ஏற்படுத்தியது. இந்நிலையில் மகளிர் காங்கிரஸ் பொதுச் செயலாளரான ரஷ்மி திடீரென பாஜவுக்கு தாவினார். ஐஷா போற்றி காங்கிரஸ் கட்சிக்கு வந்தது தான் இவரது திடீர் கட்சித்தாவலுக்கு காரணம் என்று கூறப்படுகிறது.

கடந்த சட்டப்பேரவை தேர்தலில் இவர் கொட்டாரக்கரை தொகுதியில் போட்டியிட்டார். இம்முறையும் இந்தத் தொகுதியில் தனக்கு வாய்ப்பு கிடைக்கும் என்று ரஷ்மி கருதியிருந்தார். ஆனால் ஐஷா போற்றி காங்கிரசுக்கு வந்ததால் அவருக்குத் தான் கொட்டரைக்கரை சீட் ஒதுக்கப்படும் என்று தகவல்கள் வெளியாகின. இதுதான் ரஷ்மியின் கட்சித் தாவலுக்கு காரணம் என்று கூறப்படுகிறது. திருவனந்தபுரத்தில் நடந்த நிகழ்ச்சியில் மாநில தலைவர் ராஜீவ் சந்திரசேகர் முன்னிலையில் இவர் பாஜவில் இணைந்தார். எனக்கு ஏற்பட்ட சில மோசமான அனுபவங்கள் தான் இப்போது கட்சி மாற காரணம் என்று ரஷ்மி கூறினார்.