டாக்கா: ஐசிசி டி20 உலகக் கோப்பை கிரிக்கெட் தொடர் இந்தியா மற்றும் இலங்கையில் நடைபெறுகிறது. ‘சி’ பிரிவில் வங்கதேசம், வெஸ்ட் இண்டீஸ், இத்தாலி, இங்கிலாந்து, நேபாளம் அணிகள் இடம் பிடித்துள்ளன. இந்த பிரிவில் உள்ள அணிகள் கொல்கத்தா மற்றும் மும்பையில் விளையாடுகின்றன. குரூப் ‘பி’யில் இலங்கை, ஆஸ்திரேலியா, ஓமன், ஜிம்பாப்வே, அயர்லாந்து அணிகள் இடம் பிடித்துள்ளன. இந்த அணிகள் மோதும் போட்டிகள் கொழும்பு மற்றும் பல்லேகலேயில் நடைபெற இருக்கின்றன. வங்கதேசத்தில் மைனாரிட்டி இந்துக்கள் தாக்கப்படுவதற்கு இந்தியா கண்டனம் தெரிவித்துள்ளது. இதனால் கொல்கத்தா நைட் ரைடர்ஸ் அணியில் இடம் பிடித்திருந்த முஸ்தபிஹூர் ரகுமான் விடுவிக்கப்பட்டுள்ளார்.

இந்நிலையில் பாதுகாப்பு காரணத்தை முன்வைத்து வங்கதேச அணி இந்தியாவில் விளையாட மறுத்து வருகிறது. இந்தியாவில்தான் விளையாட வேண்டும் என்று ஐசிசி வலியுறுத்தி வருகிறது. இது தொடர்பாக பேச்சுவார்த்தை நடத்த ஐசிசி குழு வங்கதேசம் சென்றுள்ளது. அந்த குழுவிடம் எங்களை சி பிரிவில் இருந்து பி பிரிவுக்கு மாற்றி விடுங்கள். ‘பி’ பிரிவில் போட்டிகள் அனைத்தும் கொழும்பு மற்றம் பல்லேகலேயில் நடைபெற இருக்கிறது. இதனால் நாங்கள் இந்தியாவில் விளையாட வேண்டியிருக்காது என வங்கேச கிரிக்கெட் போர்டு கேட்டுக் கொண்டுள்ளது. இந்நிலையில் அயர்லாந்து அணியும் குரூப் மாற்றி இந்தியா சென்று விளையாடமாட்டோம் எனத் தெரிவித்துள்ளது. முன்னதாக அறிவிக்கப்பட்ட அட்டவணைப்படிதான் விளையாடுவோம் எனத் தெரிவித்துள்ளது.

* முதல் முறையாக களமிறங்கும் இத்தாலி
டி20 உலக கோப்பை கிரிக்கெட் போட்டி தொடரில் 20 நாடுகள் பங்கேற்கின்றன. முதல் முறையாக இந்த போட்டியில் விளையாட இருக்கும் இத்தாலி அணி அறிவிக்கப்பட்டுள்ளது. முன்னாள் தென் ஆப்பிரிக்க சர்வதேச வீரர் ஜே.ஜே.ஸ்மட்ஸ் இடம் பெற்றுள்ள 15 பேர் கொண்ட அணிக்கு வெய்ன் மேட்சன் கேப்டனாக நியமிக்கப்பட்டு உள்ளார். இத்தாலி அணி வீரர்கள் விவரம்: வெய்ன் மேட்சன் (கேப்டன்), ஜைன் அலி, மார்கஸ் காம்போபியானோ, அலி ஹசன், கிரிஷன் கலுகமகே, ஹாரி மானென்டி, ஜியான் பியோரோ, அந்தோனி மோஸ்கா, ஜஸ்டின் மோஸ்கா, சையத் நக்வி, பெஞ்சமின் மானென்டி, ஜஸ்பிரீத் சிங், ஜே.ஜே. ஸ்மட்ஸ், கிரான்ட் ஸ்டூவர்ட், தாமஸ் டிராகா. இதுவரை 15 அணிகள் அறிவிக்கப்பட்டு விட்டன. பாகிஸ்தான், இலங்கை, வெஸ்ட் இண்டீஸ், ஐக்கிய அரபு எமிரேட்ஸ், அமெரிக்கா ஆகிய 5 நாடுகள் இன்னும் அணிகளை தேர்வு செய்ய வேண்டும்.