தேனூரில் திமுக சார்பில் இலவச மருத்துவ முகாம்

பொன்னமராவதி,ஜன.5: பொன்னமராவதி அருகே தேனூரில் திமுக சார்பில் இலவச மருத்துவ முகாம் நடந்தது. தமிழக இயற்கை வளங்கள்துறை அமைச்சர் ரகுபதி தலைமையில் மாநில மருத்துவரணி இணைச்செயலாளர் அண்ணாமலை முன்னிலையில் திருமயம் சட்டமன்ற தொகுதியில் மருத்துவ முகாம் நடைபெற்று வருகின்றது. இதன் ஒரு பகுதியாக பொன்னமராவதி அருகே உள்ள தேனூர் ஊராட்சியில் திமுக சார்பில் இலவச மருத்துவ முகாம் நடந்தது.

இந்த முகாமில் பொதுமக்களுக்கு மருத்துவ பரிசோதனை மேற்கொண்டு மருந்து மாத்திரைகள் இலவசமாக வழங்கப்பட்டது. இதில் புதுக்கோட்டை மாவட்ட பகுத்தறிவு மாவட்ட துணைஅமைப்பாளர் சின்னையா, நிர்வாகிகள் காஜாமைதீன், பத்மன், தகவல் தொழில்நுட்ப அணி சரவணக்குமார், சுப்பையா மற்றும் திமுக மாவட்ட, ஒன்றிய, கிளை நிர்வாகிகள் உட்பட பலர் கலந்து கொண்டனர்.