ஈரோடு, பிப். 26: ஈரோடு வீரப்பன்சத்திரம் தெப்பக்குளத்தில் கடுமையான துர்நாற்றம் வீசுவதால் பொதுமக்கள் குளத்தை சுத்தப்படுத்த கோரிக்கை விடுத்துள்ளனர். ஈரோடு மாநகராட்சிக்குட்பட்ட வீரப்பன்சத்திரம் மாரியம்மன் கோயிலுக்கு சொந்தமான தெப்பக்குளம் உள்ளது. இந்த தெப்பக்குளம் 30 அடி ஆழம் உடையது. தெப்பக்குளத்தினை சுற்றியும் 250க்கும் மேற்பட்ட குடியிருப்புகளில் மக்கள் வசித்து வருகின்றனர். மாரியம்மன் கோயிலில் திருவிழா முடிந்ததும், கம்பம் இந்த குளத்தில்தான் விடப்படும். கோயில் திருவிழா முடிந்துவிட்டதால், இந்த குளம் எவ்வித பராமரிப்பும் இன்றி கிடக்கிறது. கோடை சீசன் துவங்கி விட்டதால், தெப்பக்குளத்தில் உள்ள தண்ணீர் மாசடைந்து கடுமையான துர்நாற்றம் வீசி வருகிறது. இதனால், தெப்பக்குளத்தை சுற்றி வசிக்கும் மக்கள் கடும் அவதிக்குள்ளாகி வருகின்றனர்.