ஆரல்வாய்மொழி, ஜூலை 16: தாழக்குடி தொடக்க வேளாண்மை கூட்டுறவு வங்கியில் 22ம் தேதி தேர்தல் நடத்த நீதிமன்றம் உத்தரவிட்டதையடுத்து நேற்று வேட்புமனு தாக்கல் நடந்தது.தாழக்குடி தொடக்க வேளாண்மை கூட்டுறவு வங்கியில் கடந்த தேர்தலின் போது பலர் வேட்பு மனு தாக்கல் செய்தனர். இதில் முக்கிய பிரமுகர்களின் வேட்புமனுக்கள் தள்ளுபடி செய்யப்பட்டதால் அவர்கள் மதுரை உயர்நீதி மன்ற கிளையில் வழக்கு தொடர்ந்தனர். இந்த வழக்கை விசாரித்த நீதிமன்றம் தேர்தலுக்கு தடை விதித்து உத்தரவிட்டது. பின்னர் நீதிமன்றம் வரும் 22ம் தேதி தேர்தல் நடத்த உத்தரவு பிறப்பித்தது.இதன்படி தாழக்குடி தொடக்க வேளாண்மை கூட்டுறவு வங்கியில் நேற்று வேட்புமனு தாக்கல் நடந்தது. இதில் 3 அணியாக பிரிந்து வேட்புமனு தாக்கல் செய்தனர். அதிமுக சார்பில் பிரம்மநாயகம் என்பவர் தலைமையில் 11 பேர் அணி வேட்புமனு தாக்கல் செய்தனர். தமிழக அரசின் டெல்லி சிறப்பு பிரதிநிதி தளவாய் சுந்தரம், அதிமுக மாவட்ட செயலாளர் அசோகன், ஒன்றிய செயலாளர் கிருஷ்ணகுமார் ஆகியோர் கலந்து கொண்டனர்.