மதுரை, டிச. 4: ராமநாதபுரம் மாவட்டத்தின் 3 தாலுகாக்களுக்கு வைகையில் இருந்து தண்ணீர் வழங்கக் ேகாரிய வழக்கில், அரசுக்கு நோட்டீஸ் அனுப்ப ஐகோர்ட் கிளை உத்தரவிட்டுள்ளது. முதுகுளத்தூரைச் சேர்ந்த எம்.பிரபு, ஐகோர்ட் மதுரை கிளையில் தாக்கல் செய்த மனு: ராமநாதபுரம் மாவட்டம் முதுகுளத்தூர், கமுதி மற்றும் கடலாடி தாலுகாவில் சுமார் 160க்கும் மேற்பட்ட கிராமங்கள் உள்ளன. இந்தப் பகுதியில் குடிநீர் பற்றாக்குறை அதிகளவு உள்ளது. இதனால், பலரும் சென்னை, கோவை போன்ற பகுதிகளுக்கு இடம் பெயர்ந்து செல்கின்றனர். மதுரை, தேனி, திண்டுக்கல், சிவகங்கை மற்றும் ராமநாதபுரம் மாவட்ட குடிநீர் தேவையை போக்கிடும் வகையில் வைகையில் இருந்து தண்ணீர் வழங்கப்படுகிறது. ஆனால், வைகை ஆறு செல்லும் பரமக்குடி பகுதியில் இருந்து சுமார் 25 கி.மீ தொலைவிலுள்ள முதுகுளத்தூர், கமுதி மற்றும் கடலாடி தாலுகாக்களுக்கு வைகையில் இருந்து தண்ணீர் வழங்க அதிகாரிகள் மறுக்கின்றனர். இந்த 3 தாலுகா பகுதிக்கும் தண்ணீர் வழங்கும் உரிமை தர மறுக்கப்படுகிறது. பழைய ஆயக்கட்டு முறையில் உள்ளவர்களுக்கே வழங்கப்படுகிறது. புதிதாக வழங்க அதிகாரிகள் தயாரில்லை.