லால்குடி, நவ.15: லால்குடி அருகே முள்ளால் கிராமத்தில் புதிதாக கட்டப்பட்டுள்ள நியாய விலைக்கடையை எம்எல்ஏ சவுந்தரபாண்டியன் திறந்து வைத்தார்.லால்குடி ஒன்றியம் முள்ளால் கிராமத்தில் பல வருடங்களாக கூட்டுறவு நியாய விலைக்கடை வாடகை கட்டிடத்தில் இயங்கி வந்தது. எனவே ரேஷன் கடைக்கு சொந்த கட்டிடம் கட்ட வேண்டுமென எம்எல்ஏ சவுந்தரபாண்டியனிடம் முள்ளால் பகுதி கிராமமக்கள் கோரிக்கை வைத்தனர். அதனை ஏற்று கூரை கட்டிடத்தில் இயங்கி வந்த ரேஷன்கடைக்கு புதிய கட்டிடம் கட்டுவதற்கு தனது சட்டமன்ற தொகுதி மேம்பாட்டு வளர்ச்சி நிதியிலிருந்து ரூ.7 லட்சத்து 75 ஆயிரம் நிதி ஒதுக்கப்பட்டு சொந்தமாக கட்டிடம் கட்டி முடிக்கப்பட்டது. அதையடுத்து புதிய கட்டிடத்தின் திறப்பு விழா நடைபெற்றது.