விருதுநகர்: கொரோனா வைரஸ் பரவலை கட்டுப்படுத்த நாடு முழுவதும் கடைபிடிக்கப்படும் ஊரடங்கு காரணமாக, மக்களிடையே வாங்கும் சக்தி குறைந்து, உணவுப்பொருட்களின் விற்பனை சரிந்துள்ளது. ஊரடங்கு துவக்கிய மார்ச் 25 முதல் ஏப்.15 வரை உணவு பொருட்களை உயர் மற்றும் நடுத்தர மக்கள் போட்டி போட்டு வாங்கினர். கூலி வேலை செய்யும் அடித்தட்டு மக்கள் வேலைக்குச் செல்லாத காரணத்தால், பணப்புழக்கம் குறைந்து உணவு பொருட்கள் விற்பனை சரிவை கண்டு வருகிறது. மக்களிடமும் வாங்கும் திறன் குறைந்து வருகிறது. வட மாநிலங்களில் இருந்து விருதுநகர் மார்க்கெட்டிற்கு தினமும் 100 முதல் 150 லாரி பருப்பு, பயறு, மல்லி, வத்தல், மளிகை வரத்து இருந்தது. தற்போது தினமும் வரத்து 20 லாரிகளுக்கும் குறைவாக உள்ளது. கடுகு, வெந்தயம், சோம்பு, மல்லி, வத்தல் உள்ளிட்ட மளிகை வரத்து முற்றிலும் இல்லை. ரேசன், அம்மா உணவகம், கூட்டுறவு அங்காடிகளுக்கு அனுப்பிய உணவு பொருட்களுக்கு பணம் வழங்காததால், மொத்த வணிகர்கள் பணப்புழக்கம் இல்லையென தெரிவிக்கின்றனர். அனைத்து தொழில்களும் ஊரடங்கால் முடங்கி இருப்பதால் மக்களிடம் பணப்புழக்கம் குறைந்து வாங்கும் திறன் குறைந்து விற்பனை கடும் சரிவை சந்தித்துள்ளது.

பாமாயில் மட்டும் டின்னுக்கு ரூ.20 குறைந்துள்ளது. பயறு, பருப்பு, எண்ணெய் விலைகள் கடந்த வார விலையிலேயே விற்பனை செய்யப்படுகின்றன. வரத்து இல்லாததால் மளிகைப்பொருட்கள் விலைகள் மட்டும் உயர்ந்து வருகின்றன.

விருதுநகர் மொத்த மார்க்கெட்டில் நேற்றைய விலை நிலவரம்: உளுந்து தஞ்சை (100 கிலோ) - ரூ.7,500, பர்மா உளுந்து - ரூ.8,000, உருட்டு உளுந்தம்பருப்பு தஞ்சை  - ரூ.10,500, உருட்டு உளுந்தம்பருப்பு பர்மா -  ரூ.11,000. பாமாயில் (15 கிலோ) டின்  - ரூ.1,310. பாசிப்பயறு தஞ்சை  - ரூ.9,000, பாசிப்பருப்பு தஞ்சை  - ரூ.12,000, பாசிப்பருப்பு ஆந்திரா  - ரூ.13,000, துவரம்பருப்பு -  ரூ.11,500. ஆந்திர மாநிலம், குண்டூரில் இருந்து வத்தல், ராஜஸ்தானில் இருந்து மல்லி வரத்து இல்லை. திருமங்கலம், கமுதி, அழகாபுரி, ரெட்டியபட்டி பகுதிகளில் இருந்து நாடு வத்தல் தினசரி 300 மூட்டை வரத்து உள்ளது. குண்டூர் வத்தல் குவிண்டால்  - ரூ.17,000, நாடு வத்தல்  - ரூ.10,500 முதல் ரூ.12,500. மல்லி (40 கிலோ)  - ரூ.4,000, கடலை எண்ணெய் டின்  - ரூ.2,650, நிலக்கடலைப்பருப்பு (80 கிலோ)  - ரூ.6,650, கடலை புண்ணாக்கு (100 கிலோ)  - ரூ.4,900.