சென்னை: பாமக நிறுவனர் ராமதாஸ் வெளியிட்ட அறிக்கை: உலகின் தலைசிறந்த 100 பல்கலைக்கழகங்கள் பட்டியலில் இந்தியப் பல்கலைக்கழகங்களை இடம் பிடிக்க வைக்கும் நோக்கத்துடன், 10 அரசு பல்கலைக்கழகங்கள், 10 தனியார் பல்கலைக்கழகங்கள் என மொத்தம் 20 பல்கலைக்கழகங்களுக்கு உயர்புகழ் தகுதி (இன்ஸ்டிட்யூட் ஆப் எமினெஸ்ஸ்)வழங்க மத்திய மனிதவள மேம்பாட்டு அமைச்சகம் முடிவு செய்தது. இதில், சென்னை அண்ணா பல்கலைக்கழகமும் ஒன்றாகும். இதற்காக கட்டமைப்பு வசதிகளை அண்ணா பல்கலைக்கழகத்தில் ஏற்படுத்த 2,750 கோடி செலவாகும் என மதிப்பிடப்பட்ட நிலையில், அதில் 1000 கோடியை மத்திய அரசு வழங்கும் என்றும், மீதமுள்ள 1,750 கோடியை அடுத்த 5 ஆண்டுகளில் அண்ணா பல்கலைக்கழகத்திற்கு தமிழக அரசு வழங்க வேண்டும் என்றும் மத்திய அரசு நிபந்தனை விதித்தது. இந்த சிறப்பு அந்தஸ்தால் 69 சதவீத இடஒதுக்கீடு ரத்தாகும் என்று சர்ச்சை எழுப்பினர்.