சாய்பாசா: ‘‘பழங்குடியினரின் வனம், நிலம் மற்றும் தண்ணீருக்கு பாதுகாப்பு அரணாக காங்கிரஸ் கட்சி இருக்கும்’’ என ராகுல் காந்தி உறுதி அளித்துள்ளார். ஜார்க்கண்ட் மாநிலத்தின் சிங்க்புவாம் (எஸ்டி) மக்களவை தொகுதியில் கூட்டணி கட்சி வேட்பாளர் கீதா கோடாவை ஆதரித்து காங்கிரஸ் தலைவர் ராகுல் காந்தி நேற்று பிரசாரம் மேற்கொண்டார். அப்போது அவர் பேசியதாவது:காங்கிரசை நீங்கள் வெற்றி பெறச் செய்தால், பழங்குடியினரின் வனம், நிலம் மற்றும் தண்ணீரை பாதுகாக்கும் அரணாக நாங்கள் இருப்போம். ஏழைகளுக்கு குறைந்தபட்ச ஊதியம் வழங்கும் நியாய் திட்டமானது, நாட்டிலிருந்து ஏழ்மையை விரட்டியடிக்க நடத்தப்படும் சர்ஜிக்கல் ஸ்டிரைக் ஆகும். இத்திட்டத்தின் கீழ் ஏழைகள், விவசாயிகள், பழங்குடியினர், சிறு வர்த்தகர்களின் வங்கிக் கணக்கில் ஆண்டுதோறும் ரூ.72,000 நேரடியாக டெபாசிட் செய்யப்படும்.