சென்னை: நாடாளுமன்ற தேர்தலில் திமுக, காங்கிரஸ் கூட்டணி தமிழகம், புதுச்சேரியில் உள்ள 40 தொகுதிகளிலும் மகத்தான வெற்றி பெறும் என்று திருநாவுக்கரசர் கூறியுள்ளார்.தமிழக காங்கிரஸ் கட்சி சார்பில் நாடாளுமன்ற தேர்தல் தொடர்பான ஆய்வு கூட்டம் சென்னையில் உள்ள சத்தியமூர்த்தி பவனில் நேற்று நடந்தது. கூட்டத்துக்கு தமிழக காங்கிரஸ் தலைவர் திருநாவுக்கரசர் தலைமை தாங்கினார். இதில் அகில இந்திய செயலாளர்கள் சஞ்சய் தத், சிரிவல்ல பிரசாத், டாக்டர் செல்லக்குமார், முன்னாள் மத்திய அமைச்சர் சுதர்சன நாச்சியப்பன், காங்கிரஸ் முன்னாள் தலைவர்கள் குமரிஅனந்தன், ஈ.வி.கே.எஸ்.இளங்கோவன், கிருஷ்ணசாமி, கே.வி.தங்கபாலு உள்பட நிர்வாகிகள் கலந்து கொண்டனர்.கூட்டத்துக்கு பிறகு திருநாவுக்கரசர் நிருபர்களுக்கு பேட்டியளித்தார். அப்போது அவர் கூறியதாவது: காங்கிரஸ் உத்தரவின்படி நாடாளுமன்ற தேர்தலையொட்டி ஒருங்கிணைப்பு குழு, தேர்தல் மேலாண்மை குழு உள்பட பல்வேறு குழுக்களை அமைப்பது தொடர்பாக கலந்துரையாடல் கூட்டம் நடந்தது.இது போன்று இன்னும் பல்வேறு கட்டங்களாக இந்த கூட்டம் நடத்தப்படும். திமுக, காங்கிரஸ் கூட்டணி பலமாகவும், வலுவாகவும் இருக்கிறது. இந்த கூட்டணி தமிழகம், புதுச்சேரியில் உள்ள 40 நாடாளுமன்ற தொகுதிகளிலும் மகத்தான வெற்றியை பெறும். எப்போது தேர்தல் வந்தாலும், மத்தியில் உள்ள மதவாத பாஜ அரசையும், மாநிலத்தில் உள்ள ஊழல் அதிமுக அரசையும் மக்கள் வெளியேற்றுவதற்கு தயாராக இருக்கிறார்கள். இவ்வாறு அவர் கூறினார்.