சேலம்: திருப்பத்தூர் மாவட்டம் குரும்பேரி கிராமம் பஜனைகோயில் தெருவை சேர்ந்தவர் நவீன் (35). மனைவி மற்றும் 2 வயதில் பெண் குழந்தை உள்ளனர். மைத்துனர் சூர்யா, அவரது பெரியப்பா மகன் தேவேந்திரனுடன் நவீன், திருப்பூரில் உள்ள தனியார் பனியன் கம்பெனியில் சூப்பர்வைசராக வேலை பார்த்து வந்தார். பங்குனி உத்திரத்திற்கு குரும்பேரி முருகன் கோயிலில் அலகு குத்தி நேர்த்திக்கடன் செலுத்துவதற்காக நவீன், மைத்துனர் சூர்யா, தேவேந்திரன் ஆகியோருடன் நேற்று முன்தினம் இரவு திருப்பூர் ரயில்வே ஸ்டேஷனில் இருந்து ஜோலார்பேட்டைக்கு முன்பதிவில்லா டிக்கெட்டுடன் எர்ணாகுளம்-பெங்களூரு எக்ஸ்பிரசில் சென்றார். பயணிகள், இந்த ரயில் ஜோலார்பேட்டை செல்லாது என தெரிவித்துள்ளனர்.

இதனால், நள்ளிரவு 11.30 மணிக்கு சேலத்திற்கு ரயில் வந்ததும், 3 பேரும் இறங்கியுள்ளனர். பின்னர், நள்ளிரவு 12.15 மணிக்கு திருவனந்தபுரம்-நியூடெல்லி கேரளா எக்ஸ்பிரசில் முன்பதிவில்லா பெட்டியில் 3 பேரும் ஏறி ஜோலார்பேட்டைக்கு பயணித்தனர். சேலத்தை கடந்து ரயில் சென்றபோது, நவீன், படிக்கட்டு பகுதியில் அமர்ந்து பயணித்துள்ளார். சூர்யாவும், தேவேந்திரனும் கழிவறை பகுதியில் நின்றுள்ளனர்.

அப்போது, இந்தியில் பேசியபடி வாலிபர் ஒருவர் பயணிகளிடம் தகராறில் ஈடுபட்டுள்ளார். பிறகு படிக்கட்டு பகுதிக்கு வந்து நவீனிடம் தான் அமர இடத்தை கொடுக்கும்படி கூறி வாக்குவாதத்தில் ஈடுபட்டுள்ளார். திடீரென அவர் நவீனை தனது காலால் எட்டி உதைத்து கீழே தள்ளிவிட்டார். இதில், ஓடும் ரயிலுக்கு அடியில் நவீன் சிக்கினார். பயணிகள் உடனடியாக அந்த வாலிபரை மடக்கி பிடித்து தர்மஅடி கொடுத்து, துணியால் கையை கட்டிப்போட்டனர்.

ஜோலார்பேட்டை ரயில்வே ஸ்டேஷன் வந்ததும் ரயில்வே போலீசாரிடம் ஒப்படைத்தனர். இதனிடையே பொம்மிடி ரயில்வே ஸ்டேஷன் அருகில் தண்டவாளத்தில் உடல் மூன்று துண்டுகளாகி நவீன் இறந்து கிடந்து கண்டுபிடிக்கப்பட்டது. பிடிபட்ட வாலிபரிடம் சேலம் ரயில்வே உட்கோட்ட போலீசார் விசாரித்தனர். அதில் அவர், ஜார்க்கண்ட் மாநிலம் துல்கா மாவட்டம் மசிலியா பகுதியை சேர்ந்த பர்தேஸ்வர் டுடூ (27) எனத்தெரியவந்தது. அவர் மீது கொலை வழக்குப்பதிந்து கைது செய்துள்ளனர்.

The post படிக்கட்டில் அமர்வதில் தகராறு ஓடும் ரயிலில் இருந்து எட்டி உதைத்து பனியன் கம்பெனி ஊழியர் கொலை: ஜார்க்கண்ட் வாலிபர் கைது appeared first on Dinakaran.