சார்லஸ்டோன்: அமெரிக்காவில் நடந்து வரும் சார்லஸ்டோன் மகளிர் டென்னிஸ் ஒற்றையர் பிரிவு 2வது சுற்றுப் போட்டியில் நேற்று, அமெரிக்க வீராங்கனை மேடிசன் கீஸ் அபார வெற்றி பெற்றார். அமெரிக்காவின் சார்லஸ்டோன் நகரில், மகளிர் மட்டும் பங்கு பெறும் சார்லஸ்டோன் மகளிர் டென்னிஸ் போட்டிகள் நடந்து வருகின்றன. நேற்று நடந்த 2வது சுற்றுப் போட்டி ஒன்றில் அமெரிக்க வீராங்கனை மேடிசன் கீஸ் (31), குரோஷிய வீராங்கனை டோனா வெஹிக் (27) மோதினர்.

துவக்கம் முதல் ஆக்ரோஷ ஆட்டத்தை வெளிப்படுத்திய மேடிசன் கீஸ், முதல் செட்டை 6-2 என்ற புள்ளிக் கணக்கில் எளிதில் வசப்படுத்தினார். தொடர்ந்து நடந்த 2வது செட்டிலும் சிறப்பாக ஆடிய அவர் அந்த செட்டையும் 6-2 என்ற புள்ளிக் கணக்கில் கைப்பற்றினார். அதனால், 2-0 என்ற நேர் செட்களில் வெற்றி வாகை சூடிய அவர் 3வது சுற்றுக்கு முன்னேறினார்.

மற்றொரு போட்டியில் கனடா வீராங்கனை லெய்லா ஃபெர்னாண்டஸ் (23), ரஷ்யாவில் பிறந்து உஸ்பெகிஸ்தானுக்காக ஆடிவரும் பொலினா குதர்மெடோவா (22) மோதினர். இப்போட்டியில் சாதுரியமாக ஆடி புள்ளிகளை குவித்த லெய்லா, 6-2, 6-1 என்ற நேர் செட்களில் வெற்றி வாகை சூடி 3வது சுற்றுக்கு தகுதி பெற்றார்.