நன்றி குங்குமம் டாக்டர்

தட்டைப் பயறு, தாவரவியல் பெயர் விக்னா அன்க்யூகலட்டா (Vigna unguiculata) ஆகும். இது ஆங்கிலத்தில் மாட்டுக் கடலை (cow pea) என்று அழைக்கப்படுகிறது. மேலும் தமிழில் காராமணி என்றும் அழைக்கப்படும் பயறு வகை உணவாகும். இது புரதம், நார்ச்சத்து மற்றும் இரும்புச்சத்து நிறைந்த ஒரு சிறந்த ஆரோக்கிய உணவாகும்.

தட்டைப்பயறு – ஊட்டச்சத்து அளவு (100 கிராம்)
கலோரி – 330-340 kcal
புரதம் – 23-25 கிராம்
மாவுச்சத்து – 60-62 கிராம்
நார்ச்சத்து – 10-11 கிராம்
இரும்புச்சத்து – 8-9 மில்லிகிராம்
கால்சியம் – 100 – 110 மில்லிகிராம்
மக்னீசியம் – 180- 190 மில்லிகிராம்
ஃபோலிக் அமிலம் (வைட்டமின் பி9) – 600 + mcg
வைட்டமின் பி1 – 0.8 – 0.9 மில்லி கிராம்
வைட்டமின் பி6 0.4 மில்லிகிராம்
தட்டைப்பயறு – அனைத்து
வயதினருக்குமான ஊட்டச்சத்து.

நன்மைகள்

குழந்தைகள் (5-12 வயது)

வளர்ச்சிக்கு உதவும் புரதம் – தட்டைப்பயறில் உள்ள புரதம் குழந்தைகளின் உடல் மற்றும் தசை வளர்ச்சிக்கு உதவுகிறது. எலும்பு வலிமை – கால்சியம் மற்றும் பாஸ்பரஸ் எலும்புகள் மற்றும் பற்களை வலுப்படுத்துகின்றன. நோய் எதிர்ப்பு சக்தி – வைட்டமின் பி மற்றும் தாதுக்கள் குழந்தைகளுக்கு அடிக்கடி ஏற்படும் தொற்று நோய்களிலிருந்து பாதுகாத்து நோய் எதிர்ப்பு சக்தியை வழங்குகிறது.

இளம் வயது மாணவர்கள் (13 – 19 வயது)

கலோரி வழங்கும் உணவு – தட்டைப்பயறில் உள்ள கார்போஹைட்ரேட் மற்றும் இரும்புச்சத்து உடலுக்கு தேவையான ஆற்றலை வழங்கி சுறுசுறுப்பாக வைத்திருக்க உதவுகிறது.
மன அழுத்தம் குறைப்பு – தட்டைப் பயறில் நிறைந்திருக்கும் மக்னீசியம் நரம்பு மண்டலத்தை சீராக வைத்திருக்க உதவுகிறது.ரத்த சோகை தடுப்பு – தட்டைப்பயறில் இருக்கும் இரும்புச்சத்து, குறிப்பாக இளம் வயதில் இருக்கும் பெண் குழந்தைகளுக்கு ஏற்படும் ரத்த சோகையைத் தடுக்கிறது.

பெரியவர்கள் (20-50 வயது)

இதய ஆரோக்கியம் – தட்டைப் பயறில் நிறைந்திருக்கும் நார்ச்சத்து மற்றும் பொட்டாசியம், கொலஸ்ட்ரால் ஆகியவை ரத்த அழுத்தத்தை கட்டுப்படுத்த உதவுகிறது.
சர்க்கரைநோய் கட்டுப்பாடு – தட்டைப்பயறில் இருக்கும் குறைந்த கிளைசமிக் குறியீடு காரணமாக ரத்த சர்க்கரை அளவை சீராக வைத்திருக்க உதவுகிறது.
உடல் எடை கட்டுப்பாடு – தட்டைப்பயறு நீண்ட நேரம் பசியைத் தடுக்க உதவுவதால் அதிக உணவு உண்ணும் பழக்கம் குறைகிறது. இதனால், உடல் எடை கூடுவதை தடுக்கிறது.

முதியவர்கள் (50 வயதுக்கு மேல்)

எலும்பு சிதைவு தடுப்பு – தட்டைப்பயறில் அதிக அளவு கால்சியம் மற்றும் மக்னீசியம் இருப்பதால் எலும்புபலவீனத்தை அது குறைக்கிறது.
செரிமான மேம்பாடு – தட்டைப்பயறில் நிறைந்திருக்கும் நார்ச்சத்து மலச்சிக்கலைத் தடுக்க உதவுகிறது.
இதயம் மற்றும் மூளை ஆரோக்கியம் – ரத்த ஓட்டத்தை மேம்படுத்துவதோடு நினைவாற்றலை பாதுகாக்க உதவுகிறது.

பெண்கள் – (கர்ப்பிணி மற்றும் மாதவிடாய் காலம்)

தட்டைப்பயறில் நிறைந்திருக்கும் ஃபோலிக் அமிலம் கருவின் மூளைமற்றும் நரம்பு வளர்ச்சிக்கு உதவுகிறது. இரும்புச்சத்து – கர்ப்ப காலத்தில் பெண்களுக்கு ஏற்படும் ரத்த சோகையை தட்டைப்பயறு தடுக்கிறது. ஹார்மோன் சமநிலை – தட்டைப்பயறில் உள்ள வைட்டமின் பி குழு ஹார்மோன் செயல்பாடுகளை மேம்படுத்துகிறது.

சருமம் மற்றும் முடி ஆரோக்கியம்

தட்டைப்பயறில் உள்ள புரதம் மற்றும் ஆன்டி – ஆக்ஸிடன்ட்கள், சருமத்தை ஆரோக்கியமாக வைத்திருக்க உதவுகின்றன. மேலும், முடி உதிர்வு குறையவும், முடி வளர்ச்சி மேம்படவும் உதவுகிறது. மேலும், உடலுக்குத் தேவையான ஊட்டச்சத்துகளை வழங்குவதன் மூலம்இயற்கையான அழகை பாதுகாக்கிறது.

முடிவுரை: தட்டைப்பயறு என்பது வயது வேறுபாடு இல்லாமல் அனைவரும் உணவில் சேர்த்துக் கொள்ள வேண்டிய ஒரு சிறந்த ஊட்டச்சத்து நிறைந்த உணவாகும். சரியான அளவில், முறையாக தினசரி சமைத்து உண்ணும்போது, உடல் வளர்ச்சி, நோய் எதிர்ப்பு சக்தி மற்றும் முழுமையான ஆரோக்கியம் ஆகியவற்றை வழங்குகிறது. நமது பாரம்பரிய உணவான தட்டைப்பயறை தினசரி உணவில் சேர்ப்பது மிகவும் அவசியமானதும் ஆகும். இது ஆரோக்கியமான வாழ்க்கைக்கு வழிவகுக்கும்.

தொகுப்பு: உணவியல் நிபுணர் சங்கீதா