புதுச்சேரி: புதுச்சேரி மாநில தி.மு.க சட்டமன்ற கட்சி நிர்வாகிகளுக்கான நியமனம் திமுக தலைமை கழகத்தில் இருந்து அறிவிக்கப்பட்டுள்ளது. அதில் புதுச்சேரி மாநில தேர்தல் பொறுப்பாளர் மற்றும் கொள்கை பரப்பு செயலாளர் எஸ்.ஜெகத்ரட்சகன் எம்.பி. தலைமையில், புதுச்சேரி மாநிலக் கழக அமைப்பாளர் ரா.சிவா அவர்கள் முன்னிலையில் இன்று வெற்றி பெற்ற கழக சட்டமன்ற உறுப்பினர்களின் கூட்டம் நடைபெற்றது.

சட்டப்பேரவைத் தேர்தலில் 13 தொகுதிகளில் போட்டியிட்ட திமுக 5 தொகுதிகளில் வெற்றி பெற்றது. அதனால் திமுக எதிர்க்கட்சியானது. புதுச்சேரி மாநில சட்டப்பேரவை தேர்தலில் வெற்றி பெற்ற சட்டமன்ற உறுப்பினர்களுடன் கலந்து பேசி, புதுச்சேரி மாநில திமுக சட்டமன்ற கட்சி நிர்வாகிகள் அனைவரும் சேர்ந்து, காரைக்கால் வடக்கு தொகுதியில் போட்டியிட்டு வென்ற நாஜிம் எம்எல்ஏ அவர்கள் புதுச்சேரி திமுக சட்டமன்றக் கட்சித் தலைவராக நியமிக்க ஒப்புதல் தெரிவித்தனர்.

ஏ.எம்.எச்.நாஜிம் எம்எல்ஏ புதுச்சேரி திமுக சட்டமன்ற கட்சி தலைவராகவும் துணை தலைவராக ஆர்.ஆர்.செந்தில் குமார் எம்.எல்.ஏவும் அதே போல கொறடாவாக ஏ.கே.ரமேஷ் எம்.எல்.ஏவும் தேர்தெடுக்கபட்டுள்ளனர். மேலும் செயலாளராக வி.கார்த்திகேயன் எம்.எல்.ஏ-வும்; பொருளாளராக விக்னேஷ் கண்ணன் எம்.எல்.ஏ-வும் நியமிக்கப்பட்டுள்ளனர்.