ஊட்டி,மார்ச் 13: ஊட்டி அரசு தாவரவியல் பூங்காவில் உள்ள குளங்களை தூர் வாரும் பணிகள் நிறைவடைந்த நிலையில், கரையை சுற்றிலும் மலர் நாற்று நடவு பணி விரைவில் துவக்கப்படவுள்ளது.சர்வதேச சுற்றுலா நகரமான ஊட்டிக்கு நாள்தோறும் ஏராளமான சுற்றுலா பயணிகள் வெளிநாடுகள் மற்றும் வெளி மாநிலங்களில் இருந்து அதிகளவு வருகின்றனர். இங்கு வரும் சுற்றுலா பயணிகளை மகிழ்விக்கும் வகையில் பூங்காவில் மலர் நாற்றுகள் நடவு செய்யப்பட்டு, அதில் பல வண்ண மலர்கள் பூத்துக் குலுங்கும். குறிப்பாக, கோடை விடுமுறையின்போது வரும் சுற்றுலா பயணிகளை மகிழ்விக்கும் பொருட்டு பூங்காவில் பல்வேறு அலங்காரப் பணிகள், மேம்பாட்டு பணிகள் மேற்கொள்ளப்படுவது வழக்கம். இந்நிலையில், கோடை சீசன் துவங்கியுள்ள நிலையில், தற்ேபாது பூங்காவில் நாற்று நடவு செய்யப்பட்டு அதனை பராமரிக்கும் பணிகள் மேற்கொள்ளப்பட்டு வருகிறது.