திருப்போரூர், ஜன. 31: பழைய மாமல்லபுரம் சாலையின் இருபுறமும் உள்ள முட்செடிகள் வாகன ஓட்டிகளின் கண்களை பதம் பார்க்கின்றன. இதனை, உடனே அகற்ற வேண்டும் என வலியுறுத்தப்படுகிறது. பழைய மாமல்லபுரம் சாலையில் உள்ள கேளம்பாக்கம் - திருப்போரூர் இடையே 8 கிமீ தூரம் உள்ளது. இந்த சாலையில் மாமல்லபுரம் நோக்கி செல்லும் வாகனங்களும், அங்கிருந்து சென்னை நோக்கி செல்லும் வாகனங்களும் செல்கின்றன. இதனால் காலை 5 மணிமுதல் இரவு 11 மணிவரை இச்சாலையில் அதிக வாகனப் போக்குவரத்து இருக்கும்.கேளம்பாக்கம், திருப்போரூர் இடையே தையூர் என்ற இடத்தில் சுமார் 1000 ஏக்கர் பரப்பளவுக்கு மேல் உப்பளம் மற்றும் தனியார் வீட்டு மனைப்பிரிவுகள் உள்ளன. இந்த உப்பளம் தற்போது முறையாக செயல்படாததாலும், வீட்டு மனைப்பிரிவுகளில் இதுவரை யாரும் வீடு கட்டி குடியேறாததாலும் ஏராளமான சீமைக் கருவேல மரங்கள் வளர்ந்துள்ளன.