டோக்கியோ: ஜப்பானில் உள்ள வெந்நீர் ஊற்றில் குளிக்கும் பெண்களை ரகசியமாக புகைப்படம் எடுத்து விற்பனை செய்த கும்பல் போலீசில் சிக்கி உள்ளது. அந்த கும்பலை சேர்ந்த டாக்டர் உட்பட 17 பேர் கைது செய்யப்பட்டனர்.
ஜப்பானின் முக்கிய நகரங்களில் சுற்றுலாப் பயணிகளுக்காக வெப்ப நீரூற்றுகள் அமைக்கப்பட்டுள்ளன. ஒவ்வொரு ஆண்டும் லட்சக்கணக்கான மக்கள் வெப்ப நீருற்றிற்கு சென்று ஜாலியாக இருந்து வருவர். கடந்த 2 ஆண்டாக கொரோனா ஊரடங்கு காரணமாக வெப்ப நீருற்று மையங்கள் மூடப்பட்டன. தற்போது கொரோனா கட்டுப்பாடுகள் தளர்த்தப்பட்டதால் மீண்டும் அவை செயல்படத் தொடங்கி உள்ளன. இந்நிலையில் வெந்நீர் ஊற்றுகளில் குளிக்கும் பெண்களை ரகசியமான கேமராவை பயன்படுத்தி புகைப்படங்களையும், வீடியோக்களையும் சிலர் எடுத்து விற்பனை செய்து வருவதாக ஷிசுவோகா மாகாண போலீசாருக்கு தகவல் கிடைத்தது. அதையடுத்து பெண்கள் குளிக்கும் படங்களை எடுத்த விவகாரத்தில் 17 பேரை போலீசார் கைது செய்துள்ளனர்.