கன்னியாகுமரி: கன்னியாகுமரி கடலில் அமைந்துள்ள 133 அடி உயர திருவள்ளுவர் சிலையில் ரசாயன கலவை பூசி பராமரிக்கும் பணிகள் நிறைவடைந்துள்ளன. இதையடுத்து விரைவில் சுற்றுலா பயணிகளுக்கு அனுமதி வழங்கப்படும் என்று அதிகாரிகள் தெரிவித்துள்ளனர். சர்வதேச சுற்றுலாத்தலமான கன்னியாகுமரி கடலில் கடந்த 2000 ம் ஆண்டு அப்போதைய முதல்வர் கலைஞரால் 133 அடி உயர திருவள்ளுவர் சிலை திறக்கப்பட்டது. தற்போது திமுக ஆட்சி அமைந்த பிறகு, ரூ.1 கோடி செலவில் சிலை பராமரிப்பு பணி கடந்த 2022 ஜூன் 6ம் தேதி தொடங்கியது. சிலையை சுற்றி 60 டன் எடை கொண்ட ராட்சத இரும்பு பைப்புகளாலான சாரம் அமைக்கப்பட்டது. முதலில் சிலையை தண்ணீர் கொண்டு முழுவதுமாக சுத்தம் செய்து, இணைப்பு பகுதிகளில் உள்ள வெடிப்புகளை சீரமைக்கும் விதமாக சுண்ணாம்பு, கடுக்காய், பனை வெல்லம் கொண்ட கலவை பூசும் பணி நடந்தது.