புதுடெல்லி: இந்திய மகளிர் கிரிக்கெட் அணி நட்சத்திர வீராங்கனை மிதாலி ராஜ் (39 வயது), அனைத்து வகை சர்வதேச கிரிக்கெட் போட்டிகளில் இருந்தும் ஓய்வு பெறுவதாக அறிவித்துள்ளார்.மாஸ்டர் பேட்ஸ்மேன் சச்சின் டெண்டுல்கரைப் போல, மகளிர் கிரிக்கெட்டில் 23 ஆண்டுகள் நிலைத்து நின்று விளையாடி பல்வேறு சாதனைகளை படைத்திருக்கும் மிதாலி, இந்திய அணி கேப்டனாகவும் பல வெற்றிகளைக் குவித்து முத்திரை பதித்தவர். ராஜஸ்தான் மாநிலம் ஜோத்பூரில் பிறந்தவர் என்றாலும், இவரது பெற்றோர் தமிழகத்தை பூர்வீகமாகக் கொண்டவர்கள் என்பது குறிப்பிடத்தக்கது.இந்திய அணிக்காக 1999ல் அறிமுகமான மிதாலி 12 டெஸ்டில் 699 ரன் (அதிகம் 214, சராசரி 43.68, சதம் 1, அரை சதம் 4), 232 ஒருநாள் போட்டியில் 7,805 ரன் (அதிகம் 125*, சதம் 7, அரை சதம் 64), 89 டி20 போட்டியில் 2,364 ரன் (அதிகம் 97*, சராசரி 37.52, அரை சதம் 17) குவித்துள்ளார்.