சென்னை: ஆவடி மாநகராட்சியின் மேயர் வேட்பாளர் ஜி.உதயகுமார். இவர் 9வது வார்டில் திமுக சார்பில் போட்டியிட்டு வெற்றி பெற்றவர். திமுக வட்டச்செயலாளர். 10ம் வகுப்பு படித்துள்ளார். திருமுல்லைவாயில் காலனி, திருவள்ளுவர் தெருவில் குடும்பத்துடன் வசிக்கிறார். தந்தை குணசேகரன் ஓய்வுபெற்ற பாதுகாப்பு துறை ஊழியர். உதயகுமாரின் மனைவி வினாயகி(28). ஜெய் ஆதித்யா (4) என்ற மகன் உள்ளார். ஏழ்மையான குடும்பத்தை சார்ந்தவர். இவரது குடும்பமே திமுக குடும்பம். இவரை, ஆவடி மாநகராட்சி மேயராக திமுக அறிவித்துள்ளதை அடுத்து கட்சியினர் பெருமை அடைந்துள்ளனர். மேயர் வேட்பாளர் ஜி.உதயகுமார் கட்சி தலைவரும், முதல்வருமான மு.க.ஸ்டாலின், திருவள்ளூர் மத்திய மாவட்ட செயலாளரும், பால்வளத்துறை அமைச்சருமான ஆவடி சா.மு.நாசரை சந்தித்து வாழ்த்து பெற்றார்.

மேலும், இவரை கட்சி நிர்வாகிகள், தொண்டர்கள் சந்தித்து வாழ்த்து தெரிவித்தனர் என்பது குறிப்பிடத்தக்கது. ஆவடி மாநகராட்சியின் துணை மேயர் வேட்பாளராக மதிமுக செயலாளரும், கவுன்சிலரான எஸ்.சூரியகுமார் அறிவிக்கப்பட்டு உள்ளார். ஆவடி மாநகராட்சியில், 23 வது வார்டு கவுன்சிலராக எஸ்.சூரியகுமார் தேர்வு செய்யப்பட்டார். இவர், மதிமுக மாநகர செயலாளராக பணியாற்றி வருகிறார். சூரியகுமாரின் மனைவி பார்வதி (44). இவர்களது மகன் விஷ்ணுவரதான் (13). இவர், மதிமுக தலைமை நிலைய செயலாளர் துரை வைகோ, பால் வளத்துறை அமைச்சர் ஆவடி சா.மு.நாசர், மதிமுக தேர்தல் பணி செயலாளர் வக்கீல் ஆவடி அந்திரிதாஸ் ஆகியோரை சந்தித்து வாழ்த்து பெற்றார்.