நாங்குநேரி: நெல்லை மூலைக்கரைப்பட்டி அருகே நடத்தை சந்தேகத்தில் கர்ப்பிணி கழுத்து நெரித்துக் கொலை செய்யப்பட்டார். இதுதொடர்பாக அவரது தாய் மற்றும் தங்கையை போலீசார் கைது செய்தனர். நெல்லை மாவட்டம் மூலைக்கரைப்பட்டி அடுத்த முத்துவீரப்பபுரத்தைச் சேர்ந்தவர் முருகன். இவரது மனைவி முருகம்மாள் (60). தம்பதிக்கு ஒரு மகன் மற்றும் சேர்மக்கனி (35), அருணாசலம் என்ற செல்வி (30) உள்ளிட்ட 4 மகள்கள். இவர்களில் சேர்மக்கனியை களக்காடு அருகே பொத்தைசுத்தி கிராமத்தைச் சேர்ந்த கூலித் தொழிலாளி சுடலைமுத்துக்கு ஓராண்டுக்கு முன் திருமணம் செய்து கொடுத்தனர். கருத்து வேறுபாட்டால் கணவரை பிரிந்த சேர்மக்கனி, தாய் வீட்டில் வசித்து வந்தார். பின்னர் அவரது தங்கை அருணாசலத்தை சுடலைமுத்துவுக்கு 2வதாக திருமணம் செய்து கொடுத்தனர். ஆனால், அவரும் கணவரைப்பிரிந்து தாய் வீடு திரும்பினார்.