லக்னோ: ராமஜென்ம பூமி வழக்கில் உச்ச நீதிமன்ற அளித்த தீர்ப்பை அடுத்து அயோத்தியில் அமைக்கப்பட உள்ள புதிய மசூதி, பழைய பாபர் மசூதியின் அளவிலேயே கட்டப்படும் என அறக்கட்டளை அதிகாரி தெரிவித்துள்ளார். உத்தரப்பிரதேச மாநிலம், அயோத்தியில் சர்ச்சைக்குரிய இடமாக இருந்த இடத்தில் ராமர் கோயிலை கட்டுதவற்கும், மாற்று இடத்தில் மசூதி கட்டுவதற்கும் உச்ச நீதிமன்றம் உத்தரவிட்டிருந்தது. கடந்த மாதம் ராமர் கோயில் கட்டுவதற்கான பூமி பூஜை நடைபெற்றது. இந்நிலையில், உச்ச நீதிமன்ற உத்தரவை தொடர்ந்து மசூதி அமைப்பதற்காக, அயோத்தி அருகே உள்ள தானிப்பூர் கிராமத்தில் 5 ஏக்கர் நிலத்தை மாநில அரசு ஒதுக்கீடு செய்துள்ளது. இங்கு மசூதி கட்டுவதற்காக, ‘இந்தோ - இஸ்லாமிய கலாசார அறக்கட்டளை’ என்ற பெயரிலான அமைப்பை உத்தரப் பிரதேச சன்னி மத்திய வாரியம் அமைத்துள்ளது.