சென்னை: ஆசிரியர் தகுதித்தேர்வு எழுதி தேர்ச்சி அடைந்து 7 ஆண்டுகள் நிறைவு செய்தவர்களுக்கு மீண்டும் வேலை வாய்ப்பில் முன்னுரிமை வழங்கப்படமாட்டாது. அவர்கள் மீண்டும் தகுதித் தேர்வை எழுதி தேர்ச்சி பெற்றால் மட்டுமே வாய்ப்பு வழங்கப்படும் என்று பள்ளிக் கல்வித்துறை அமைச்சர் செங்கோட்டையன் தெரிவித்தார். கொரோனா ஊரடங்குக்கு பிறகு செப்டம்பர் 1ம் தேதி முதல் தமிழகத்தில் அனைத்து நூலகங்களும் இயங்கத்தொடங்கும் என்று அரசு அறிவித்தது. இதையடுத்து, சென்னையில் உள்ள அண்ணா நினைவு நூற்றாண்டு நூலகத்தில் மேற்கொண்டுள்ள ஏற்பாடுகளை பார்வையிட பள்ளிக் கல்வித்துறை அமைச்சர் செங்கோட்டையன் நேற்று காலை கோட்டூர்புரம் வந்தார். அண்ணா நூற்றாண்டு நூலகத்தில் செய்யப்பட்டுள்ள ஏற்பாடுகளை ஆய்வு செய்தார். அப்போது அவர் அளித்த பேட்டி: அண்ணா நூற்றாண்டு நூலகத்தில் 6 லட்சத்து 14 ஆயிரம் நூல்கள் உள்ளன. மத்திய அரசு அறிவிக்கும் பொதுத் தேர்வுகள், சிவில்தேர்வுகள் ஆகியவற்றை மாணவர்கள் எதிர்கொள்ளும் வகையில் அனைத்து பிரிவுகளும் இன்று(நேற்று) முதல் செயல்படத் தொடங்கியுள்ளன. மாலை நேரத்தில் தூய்மைப் பணிகள் நடக்க இருப்பதால் 8 மணி முதல் 2மணி வரை செயல்படும்.