பெய்ஜிங்: பேட்மின்டன் போட்டியில் 5 முறை உலக சாம்பியன் பட்டம் வென்ற சீன வீரர் லின் டான், ஒலிம்பிக் போட்டி தள்ளிப் போனதையடுத்து விளையாட்டில் இருந்து தனது ஓய்வை அறிவித்துள்ளார். சீனாவை சேர்ந்த பேட்மின்டன் வீரர் லின் டான் (37). லின் தனது 17வது வயதில் ஆசிய ஜூனியர் சாம்பியன்ஷிப் போட்டியில் தங்கம் வென்றதுடன் தனது பதக்க வேட்டையை தொடங்கினார். அதன்பிறகு பேட்மின்டன் உலகின் முடிசூடா மன்னனாக விளங்கிய லின், உலக சாம்பியன் போட்டியில் 2006, 2007, 2009, 2011, 2013 என 5முறை தங்கமும், 2005, 2017ம் ஆண்டுகளில் வெளிப்பதக்கமும் வென்றுள்ளார். இப்படி 5 முறை உலக சாம்பியன் பட்டம் வென்றதுடன் 2008 பெய்ஜிங், 2012 லண்டன் ஒலிம்பிக் போட்டிகளில் தங்கப்பதக்கங்களை வென்றார். மேலும் ஆசிய விளையாட்டுப் போட்டிகளில் 5 தங்கம், 2வெள்ளி, ஒரு வெண்கல பதக்கங்களை கைப்பற்றியுள்ளார். அதுமட்டுமல்ல உலக கோப்பையை 2 முறையும் சுதிர்மன், தாமஸ் கோப்பைகள் என சர்வதேச அரங்கில் லின் சாதித்தவை ஏராளம்.