ஈபோ: சுல்தான் அஸ்லான் ஷா கோப்பை ஹாக்கி போட்டித் தொடரில், இந்திய அணி தனது கடைசி லீக் ஆட்டத்தில் 10-0 என்ற கோல் கணக்கில் போலந்து அணியை வீழ்த்தியது. மலேசியாவின் ஈபோ நகரில் நடைபெற்று வரும் இந்த தொடரில், மொத்தம் 6 அணிகள் லீக் சுற்றில் மோதின. இந்திய அணி முதல் லீக் ஆட்டத்தில் 2-0 என்ற கோல் கணக்கில் ஜப்பான் அணியை வென்றது. அடுத்து தென் கொரியாவுடன் நடந்த 2வது லீக் ஆட்டம் 1-1 என்ற கணக்கில் டிரா ஆனது. மூன்றாவது லீக் ஆட்டத்தில் மலேசிய அணியுடன் மோதிய இந்தியா 4-2 என்ற கோல் கணக்கில் வெற்றியை வசப்படுத்தியது. அடுத்து கனடா அணியுடன் மோதிய இந்தியா 7-3 என்ற கோல் கணக்கில் அபாரமாக வென்று பைனல் வாய்ப்பை உறுதி செய்தது. இந்த நிலையில், 5வது மற்றும் கடைசி லீக் ஆட்டத்தில் போலந்து அணியை நேற்று எதிர்கொண்ட இந்தியா 10-0 என்ற கோல் கணக்கில் பந்தாடியது.