சூப்பர் நேச்சுரல் திரில்லர் கதை கொண்ட ‘தி பிளாக் பைபிள் (22:18)’ என்ற படத்தின் பர்ஸ்ட் லுக் மற்றும் டீசர் வெளியாகியுள்ளது. பேய் பழிவாங்கும் என்ற வழக்கமான பாணியை தவிர்த்துவிட்டு, மிகவும் வித்தியாசமான மர்மம், நாட்டுப்புற மரபு, பயம் நிறைந்த ஒரு கதையை திரையில் சொல்லியிருக்கிறார், எழுதி இயக்கியுள்ள மணிகண்டன் ராமலிங்கம். ‘சுழல்: தி வொர்டெக்ஸ்ட்’ என்ற வெப்தொடரில் நடித்திருந்த எஃப்.ஜே, இதில் முக்கியமான கேரக்டரில் நடித்துள்ளார். மற்றும் சாந்தினி தமிழரசன், ஸ்ரீஜா ரவி, மோனா பெத்ரா, அய்ரா பாலக் நடித்துள்ளனர். தமிழ்நாடு, கேரளா எல்லையிலுள்ள அஸ்தினாபுரம் என்ற கிராமத்தில் கதை நடக்கிறது.

காலனித்துவ கால மாந்திரீகம் மற்றும் சூனியத்தால் நீண்ட காலமாக சபிக்கப்பட்ட நிலத்தின் பிடியிலிருந்து தப்பிக்க துடிக்கும் அலிஷா, அவரது தாயார் ஆகியோரை சுற்றி கதை நடக்கிறது. அவர்கள் தப்பித்து ஓட முயற்சிக்கும்போது ஆழமான, ஆபத்தான ஒரு இடத்தில் சிக்குகின்றனர். அலிஷாவின் காதலர் அவர்களுக்கு உதவ முன்வருகிறார். பிறகு என்ன நடக்கிறது என்பது மீதி கதை. இ.பி.எஸ் பிக்சர்ஸ் தயாரிக்க, பாலாஜி ராமசாமி ஒளிப்பதிவு செய்ய, அஸ்வின் கிருஷ்ணா இசை அமைத்துள்ளார்.