கோவை: கொடநாடு கொலை, கொள்ளை வழக்கு விசாரணை தொடர்பாக ஜெயலலிதாவின் வளர்ப்பு மகன் சுதாகரன் கோவை சிபிசிஐடி அலுவலகத்தில் இன்று ஆஜரானார். கொடநாடு கொலை, கொள்ளை வழக்கு தொடர்பாக சிபிசிஐடி போலீசார் தற்போது வரை 600க்கும் மேற்பட்டோரிடம் விசாரித்துள்ளனர். இந்நிலையில், இந்த வழக்கில் கைதானவர்கள் மற்றும் எதிர்தரப்பினர் தங்களுக்கு ஒரு சிலர் மீது சந்தேகம் இருப்பதாக நீதிமன்றத்தில் மனு தாக்கல் செய்தனர். இதைதொடர்ந்து, 18 பேரிடம் விசாரிக்க உயர் நீதிமன்ற நீதிபதி வேல்முருகன் அமர்வு உத்தரவிட்டது.

அதன்பேரில், கொடநாடு எஸ்டேட் பங்களாவில் முன்னாள் பங்குதாரராக சுதாகரன் இருந்ததால் பணம், விலை உயர்ந்த பொருட்கள் பங்களாவில் வைக்கப்பட்டிருந்தனவா என்பது குறித்த தகவல்களை கேட்டறிய முன்னாள் முதல்வர் ஜெயலலிதாவின் வளர்ப்பு மகன் சுதாகரனை இன்று, சிபிசிஐடி அலுவலகத்தில் ஆஜராக சிபிசிஐடி போலீசார் சம்மன் அனுப்பி இருந்தனர். இதைத்தொடர்ந்து சுதாகரன் இன்று காலை கோவை காந்திபுரத்தில் உள்ள சிபிசிஐடி அலுவலகத்தில் ஆஜரானார். அவரிடம் சிபிசிஐடி போலீசார் தீவிர விசாரணை நடத்தி வருகின்றனர்.

The post கொடநாடு கொலை, கொள்ளை வழக்கு; ஜெயலலிதாவின் வளர்ப்பு மகன் சுதாகரன் கோவை சிபிசிஐடி அலுவலகத்தில் ஆஜர் appeared first on Dinakaran.