தஞ்சாவூர்: பிரசன்ன ராஜகோபால சுவாமி கோயிலுக்கு புதிய அறங்காவலர்கள் நியமிக்கப்பட்டது தொடர்பாக தவறான தகவலை முகநூலில் பரப்பிய விஸ்வ இந்து பரிஷத் அமைப்பின் மாநில அமைப்பாளரை தனிப்படை போலீசார் நேற்று கைது செய்தனர். தஞ்சாவூர் மாவட்டம் அய்யம்பேட்டையில் பிரசன்ன ராஜகோபால சுவாமி கோயில் அமைந்துள்ளது. இந்த கோயிலில் புதிய அறங்காவலர்கள் நியமிக்கப்பட்டனர். இதில் இஸ்லாமியர் ஒருவரை நியமித்ததாக விருதுநகர் மாவட்டம், ராஜபாளையம், சிவகாமிபுரம் தெருவை சேர்ந்த சரவணகார்த்தி, தனது முகநூல் பக்கத்தில் கலவரத்தை தூண்டும் வகையில் தவறான செய்தியை பதிவிட்டதாக கூறப்படுகிறது.

இது தொடர்பாக அய்யம்பேட்டை காவல் நிலையத்தில் கடந்த 20ம் தேதி புகார் செய்யப்பட்டது. இந்த புகாரின் பேரில் போலீசார் வழக்கு பதிந்து நடத்திய விசாரணையில், அறங்காவலராக நியமிக்கப்பட்டவர் இந்து மதத்தை சார்ந்தவர் என்பதும், தவறான தகவலை முகநூலில் பதிவிட்டு இரு மதத்தினருக்கிடையே ஒரு பதட்டமான சூழ்நிலை உருவாக காரணமாக இருந்ததும் தெரியவந்தது. தஞ்சாவூர் மாவட்ட எஸ்பி ராஜாராம் உத்தரவின்பேரில் தனிப்படை போலீசார், விஸ்வ இந்து பரிஷத் அமைப்பின் மாநில அமைப்பாளர் சரவணகார்த்தியை (43) சென்னையில் கைது செய்து நேற்று தஞ்சாவூர் அழைத்து வந்தனர். தொடர்ந்து அவரிடம் விசாரணை நடத்தப்பட்டு வருகிறது.

The post முகநூலில் தவறான தகவலை பரப்பியதாக விஎச்பி மாநில அமைப்பாளர் சென்னையில் கைது appeared first on Dinakaran.