லாகூர்: பாகிஸ்தான் ஆக்கிரமிப்பு காஷ்மீரில் இருக்கும் தீவிரவாதிகள் வெளியிட்ட வீடியோவில், மோடியும், அமித் ஷாவும் எதிரிகள் என்று குறிப்பிட்டுள்ளனர். இந்தியா – பாகிஸ்தான் எல்லையில் அமைந்திருக்கும் பாகிஸ்தான் ஆக்கிரமிப்பு காஷ்மீரில், காசா – இஸ்ரேல் இடையிலான போருக்கு ‘ஹமாஸ்’ அமைப்பினர் முகாமிட்டுள்ளதாக கூறப்படுகிறது. இவர்களுக்கு பாகிஸ்தானின் உளவு அமைப்பான ஐஎஸ்ஐ ஆதரவளித்து வருகிறது. இந்தியாவுக்கு எதிராக எல்லை தாண்டிய பயங்கரவாதத்தை ஹமாஸ் அமைப்பினர் தீவிரப்படுத்த திட்டமிட்டு இருப்பதாகவும் உளவு தகவல்கள் வெளியாகி உள்ளன.

ஹமாஸ் அமைப்பினர் தற்போது வரை இஸ்ரேல் – பாலஸ்தீன மோதலில் மட்டுமே கவனம் செலுத்தியது. ஆனால் தற்போது தெற்காசியா முழுவதும் செயல்படும் அடிப்படைவாத அமைப்புகளுடன் ஹமாஸ் பிரிவினர் தொடர்பை ஏற்படுத்தி உள்ளதாகவும் கூறப்பட்டுள்ளது. பாகிஸ்தான் ஆக்கிரமிப்பு காஷ்மீர் பகுதியில் வெளியான வீடியோ ஒன்று வைரலாகி உள்ளது. அந்த வீடியோவில் பேசும் ஜெய்ஷ்-இ-முகமது அமைப்பின் தலைவன் ஒருவன், ‘இந்திய பிரதமர் மோடியும், அந்நாட்டின் உள்துறை அமைச்சர் அமித் ஷாவும் நமது எதிரிகள்’ என பேசியுள்ளான்.

இந்த நிகழ்ச்சியில் லஷ்கர்-இ-தொய்பா, ஹமாஸ், ஜெய்ஷ்-இ-முகமது ஆகிய தீவிரவாத அமைப்புகளின் தலைவர்கள், நிர்வாகிகள் கலந்து கொண்டதாக அந்த வீடியோவில் கூறப்பட்டுள்ளது. இந்த வீடியோவின் உண்மைதன்மை குறித்து இந்திய உளவுத்துறை அதிகாரிகள் விசாரணை நடத்தி வருகின்றனர்.

 

The post பாக். ஆக்கிரமிப்பு காஷ்மீரில் ஹமாஸ் மோடியும், அமித் ஷாவும் எதிரிகள்; தீவிரவாதிகளின் வீடியோ வைரல் appeared first on Dinakaran.