வேதாரண்யம்: நாகப்பட்டினம் மாவட்டம் அக்கரப்பேட்டையை சேர்ந்த மீனவர்கள் ராஜ்குமார் (28), ராஜேந்திரன் (49), நாகலிங்கம் (39). இவர்கள் 3 பேரும் நேற்று முன்தினம் மதியம் வேதாரண்யம் அடுத்த கோடியக்கரையில் இருந்து அக்கரைபேட்டையை சேர்ந்த விஜயகுமாரின் பைபர் படகில் மீன் பிடிக்க கடலுக்கு சென்றனர். அவர்கள், கோடியக்கரைக்கு தென்கிழக்கே மீன்பிடித்து கொண்டிருந்தபோது, திடீரென 2 படகில் வந்த 6 இலங்கை கடற்கொள்ளையர்கள், பைபர் படகை வழிமறித்து அரிவாள், கத்தி மற்றும் கட்டையால் 3 மீனவர்களையும் சரமாரி தாக்கிவிட்டு, மீன்கள், வலைகள் உள்ளிட்ட ரூ.3 லட்சம் மதிப்புள்ள மீன்பிடி உபகரணங்களை பறித்துக் கொண்டு தப்பினர். இதில் ராஜேந்திரன், ராஜ்குமாருக்கு தலையில் வெட்டுக்காயமும், கட்டையால் தாக்கியதில் கையில் காயமும் ஏற்பட்டது.

நாகலிங்கத்துக்கு உள்காயம் ஏற்பட்டுள்ளது. பதற்றமடைந்த மீனவர்கள் அவசரமாக நேற்று காலை கரை திரும்பினர். இதுபற்றி மீனவ பஞ்சாயத்தார், கடலோர காவல் படையில் புகார் தெரிவித்தனர். காயமடைந்த 3 மீனவர்களையும் வேதாரண்யம் அரசு மருத்துவமனையில் அனுமதித்து சிகிச்சை அளிக்கப்பட்டு வருகிறது. இதேபோல் கோடியக்கரையில் இருந்து நேற்று முன்தினம் மீன் பிடிக்க சென்ற பெருமாள்பேட்டையை சேர்ந்த மீனவர்கள் குமார், லட்சுமணன், ஜெகன் ஆகியோர் கோடியக்கரை அருகே நடுக்கடலில் இரவு மீன்பிடித்துக் கொண்டிருந்தபோது படகை சுற்றி வளைத்த இலங்கை கடற்கொள்ளையர்கள் 3 மீனவர்களையும் தாக்கி ஒரு லட்சம் ரூபாய் மதிப்புள்ள வலை உள்ளிட்ட உபகாரணங்களை கொள்ளையடித்துச் சென்றுவிட்டனர்.

The post கோடியக்கரையில் நடுக்கடலில் மீன்பிடித்த 6 மீனவர்களை அரிவாளால் வெட்டி உபகரணங்கள் பறிப்பு: இலங்கை கடற்கொள்ளையர் அட்டகாசம் appeared first on Dinakaran.