சென்னை: சென்னை மாவட்ட சட்டப்பணிகள் ஆணைக்குழு மற்றும் எழும்பூர், ஜார்ஜ்டவுன் மற்றும் சைதாப்பேட்டை ஆகிய பகுதிகளில் இயங்கும் வட்ட சட்டப்பணிகள் குழுவிற்கு சட்டம் சார்ந்த தன்னார்வ தொண்டர்களாக சேவைபுரிய விருப்பமானவர்களிடம் இருந்து விண்ணப்பங்கள் வரவேற்கப்படுகிறது. சட்டம் சார்ந்த தன்னார்வ தொண்டர்களாக சேவை புரிய தகுதியானவர்கள் ஆசிரியர்கள் (ஓய்வு பெற்ற ஆசிரியர்கள் உட்பட). ஓய்வு பெற்ற அரசு ஊழியர்கள் மற்றும் மூத்தகுடிமக்கள். சமூகப் பணியில் முதுநிலைக் கல்விபயிலும் மாணவர்கள் மற்றும் ஆசிரியர்கள்.

அங்கன்வாடிப் பணியாளர்கள். மருத்துவர்கள்/உடல் நல நிபுணர்கள். மாணவர்கள் மற்றும் சட்டகல்லூரி மாணவர்கள் (அவர்கள் வழக்கறிஞராகப் பதிவுசெய்யும் வரை) அரசியல் சார்பற்ற அரசு சாரா சமூக சேவை நிறுவனங்கள் மற்றும் சங்கப்பிரமுகர்கள். மகளிர் குழுக்கள், மைத்ரிசங்கள் மற்றும் வறியோரை உள்ளடங்கிய சுய உதவிக்குழுக்கள் ஆகியவற்றின் உறுப்பினர்கள். மாவட்ட/வட்ட சட்டப்பணிகள் தன்னார்வ சட்டப்பணியாளர்கள் பணிக்கு பொருத்தமாக கருதும் நபர்.

இதர தகுதிகள்: சட்டம் சார்ந்த தன்னார்வ தொண்டர்கள் இரக்கம், ஏனையவரின் உணர்வுகள் புரிந்து கொள்ளும் தன்மை, கலப்படமற்ற தூய்மை ஆகிய அடிப்படை மனித குணங்களின் மீதுஒன்றி இருத்தல், எந்தவிதபணப் பயனும் எதிர் பார்க்காமல் தன்னார்வ சேவைபுரிதல் தங்கள் பணிகளில் இருந்து வருமானத்தை எதிர் நோக்காதவர்களாகவும், ஆனால், இச்சமூகத்தின் பலவீனமானபிரிவினர், வறியவர்கள் ஆகியோரை மேலுயர்த்துவதற்கான உறுதியும், உணரும் திறனும் உள்ளவர்களாக இருத்தல் வேண்டும்.

இதற்கு விண்ணப்பிக்க 18 வயதுக்கு மேற்பட்டவராக இருத்தல் வேண்டும். பணியிடங்கள் விவரங்கள் மற்றும் மதிப்பூதியம் சென்னை மாவட்ட சட்டப்பணிகள் ஆணைக்குழுவில் 20 நபர்களும், எழும்பூர் வட்ட சட்டப்பணிகள் குழுவில் 10 நபர்களும், ஜார்ஜ் டவுன், வட்ட சட்டப்பணிகள் குழுவில் 10 நபர்களும் மற்றும் சைதாப்பேட்டை, வட்ட சட்டப்பணிகள் குழுவிற்கு தலா 10 நபர்களும் என மொத்தம் 50 பேர் தேர்ந்தெடுக்கப்பட உள்ளனர்.

மேற்படி சட்டம் சார்ந்த தன்னார்வ தொண்டர்களுக்கான கடமை சேவை மட்டுமே உத்தியோகம் இல்லை, தற்காலிகமானது மற்றும் அதற்கு ஊதியம் எதுவும் இல்லை சேவைக்கு தகுந்த மதிப்பூதியம் மட்டுமே அளிக்கப்படும் என்பது தெரிவித்துக்கொள்ளப்படுகிறது. அதன்படி, வேலை பணிபுரியும் முழு நாள் ஒன்றுக்கு ரூ.500 மதிப்பூதியமாக வழங்கப்படும். விண்ணப்பிக்க கடைசி நாள் மற்றும் நேர்காணல்
விருப்பமுள்ளவர்கள் https://chennai.dcourts.gov.in/ என்ற இணையதளத்தில் கொடுக்கப்பட்டுள்ள விண்ணப்பப்படிவத்தை பூர்த்தி செய்து 22ம் தேதிக்குள் அலுவலக முகவரிக்கு விண்ணப்பிக்கலாம்.

விண்ணப்பித்தவர்களுக்கான நேர்காணல் 26.11.2024 அன்று காலை 10.30 மணியளவில் மாவட்ட சட்டப்பணிகள் ஆணைக்குழு, சென்னை அலுவலகத்தில் நடைபெறும். விண்ணப்பம் அனுப்ப வேண்டிய முகவரி, தலைவர், மாவட்ட சட்டப்பணிகள் ஆணைக்குழு, சென்னை. அதேபோன்று அன்றையதினம் தாலுக்காவில் இயங்கும் வட்ட சட்டப் பணிகள் குழுவிற்காக விண்ணப்பித்தவர்கள் மாவட்ட சட்டப்பணிகள் ஆணைக்குழு, சென்னை அலுவலகத்தில் நடைபெறும் நேர்காணலில் கலந்துகொள்ளவும். நேர்காணலில் கலந்து கொள்ளும் விண்ணப்பதாரர்கள் தங்களின் விண்ணப்பத்தில் இணைத்துள்ள சான்றுகளின் அசல் ஆவணங்களுடன் ஒரு மணி நேரத்திற்கு முன்பாக கலந்து கொள்ள வேண்டும்.

The post சட்டப்பணிகள் ஆணைக்குழுவில் தன்னார்வலர்களாக சேவைபுரிய விண்ணப்பம் வரவேற்கப்படுகிறது appeared first on Dinakaran.