புதுடெல்லி: நீட் தேர்வு வினாத்தாள் வெளியான விவகாரத்தில் ஒன்றிய அமைச்சர் தர்மேந்திரபிரதானை உடனே டிஸ்மிஸ் செய்ய வேண்டும் என்று ராகுல்காந்தி வலியுறுத்தி உள்ளார். நாடு முழுவதும் மே 3ஆம் தேதி நடந்த இளநிலை நீட் தேர்வு வினாத்தாள் வெளியான விவகாரம் பெரும் பரபரப்பை ஏற்படுத்தி உள்ளது. இந்த சர்ச்சை நிலவி வரும் நிலையில், ஒன்றிய கல்வி அமைச்சர் தர்மேந்திர பிரதானை பிரதமர் மோடி உடனடியாகப் பதவி நீக்கம் செய்ய வேண்டும் அல்லது அவரே தனிப்பட்ட பொறுப்பை ஏற்றுக்கொண்டு நடவடிக்கை எடுக்க வேண்டும் என்று மக்களவை எதிர்க்கட்சி தலைவர் ராகுல் காந்தி வலியுறுத்தினார்.
மேலும் பாஜ -ஆர்எஸ்எஸ் கூட்டணி இந்தியாவின் கல்வி அமைப்பையே சீரழித்துவிட்டதாக அவர் குற்றம் சாட்டினார். இதுதொடர்பாக ராகுல்காந்தி வெளியிட்ட வீடியோ பதிவு: நீட் தேர்வு நடைபெறுவதற்கு இரண்டு நாட்களுக்கு முன்பே, அதன் வினாத்தாள் ‘வாட்ஸ்அப்’ மூலம் விநியோகிக்கப்பட்டது என்பது நாடு முழுவதற்கும் தெரியும். இந்த விவகாரத்திற்கும் தனக்கும் எந்தச் சம்பந்தமும் இல்லை என்று ஒன்றிய கல்வி அமைச்சர் தர்மேந்திர பிரதான் கூறுகிறார். இந்த விவகாரத்தில் நாடாளுமன்ற குழு சில பரிந்துரைகளை அளித்திருந்தது.
ஆனால், அந்தக் குழுவில் எதிர்க்கட்சியினர் இடம்பெற்றிருந்தனர் என்றும், அதனால் அப்பரிந்துரைகள் பயனற்றவை என்றும் ஒரு சாக்குப்போக்கு கூறி, அவர் அவற்றை குப்பைத்தொட்டியில் வீசிவிட்டார். உண்மை என்னவென்றால், நீங்கள் இந்தியாவின் அடித்தளத்தையே சேதப்படுத்திவிட்டீர்கள். பணம் சம்பாதிக்கும் நோக்கத்துடன், பல்கலைக்கழகங்கள், துணைவேந்தர் மற்றும் பேராசிரியர் பதவிகளில் அமர்த்தப்பட்டுள்ள ஆர்எஸ்எஸ், பாஜ மற்றும் அவர்களைச் சார்ந்தவர்களின் கூட்டுச் சதியே இது. இந்தக் கூட்டணி இந்தியாவின் கல்வி அமைப்பையே சீரழித்துவிட்டது.
ஒரு பல்கலைக்கழகத்தின் துணைவேந்தராக ஆக வேண்டுமென்றால், பாட அறிவு, அனுபவம் ஆகியவை தேவையில்லை; ஒருவர் ஆர்எஸ்எஸ் அமைப்பைச் சார்ந்தவராக இருந்தால் மட்டும் போதும் என்பது நாடு முழுவதற்கும் தெரியும். ஒருவரின் சித்தாந்தம் ஆர்எஸ்எஸ் அமைப்பின் சித்தாந்தமாக இல்லாவிட்டால், அவரால் துணைவேந்தராக ஆக முடியாது. இதன் காரணமாகவே, நாட்டில் 80 முறை தேர்வு வினாத்தாள்கள் கசிந்துள்ளன.
2 கோடி இளைஞர்களின் எதிர்காலம் அழிக்கப்பட்டுள்ளது. எனவே நீட் வினாத்தாள் வெளியான விவகாரத்தில் ஒன்றிய கல்வி அமைச்சர் தர்மேந்திர பிரதானை உடனடியாகப் பதவிநீக்கம் செய்ய வேண்டும். இந்தச் செயலுக்குக் காரணமான குற்றவாளிகளைச் சிறையில் அடைக்க வேண்டும் என்று பிரதமர் உடனடியாக உத்தரவிட வேண்டும். இவ்வாறு தெரிவித்தார்.
* மோடி ஒரு வார்த்தை கூட பேசவில்லை
வீடியோ பதிவை இணைத்து எக்ஸ் தளத்தில் பதிவிட்ட ராகுல் காந்தி,’ 22 லட்சம் நீட் தேர்வு ஆர்வலர்கள் வஞ்சிக்கப்பட்டுள்ளனர். இருப்பினும், பிரதமர் மோடி இதுகுறித்து ஒரு வார்த்தைகூடப் பேசவில்லை. தர்மேந்திர பிரதானை உடனடியாகப் பதவியிலிருந்து நீக்குங்கள் அல்லது நீங்களே தனிப்பட்ட பொறுப்பை ஏற்றுக்கொண்டு நடவடிக்கை எடுங்கள். மோடி அவர்களே, தர்மேந்திர பிரதானை இப்போதே பதவி நீக்கம் செய்யுங்கள். தர்மேந்திர பிரதான் 22 லட்சம் நீட் தேர்வு ஆர்வலர்களை வஞ்சித்துள்ளார். நாடாளுமன்றத்தையே நம்பாதவர்களிடம் நீட் சீர்திருத்தங்களை எப்படி நம்பி ஒப்படைக்க முடியும்’ என்று கேள்வி எழுப்பியுள்ளார்.
* தேசிய தேர்வு முகமை மாற்றியமைப்பு
நீட் வினாத்தாள் கசிவு விவகாரத்தால் கடும் நெருக்கடிக்கு உள்ளாகியுள்ள தேசிய தேர்வு முகமையில் தலா இரண்டு இணைச் செயலாளர்கள் மற்றும் இணை இயக்குநர்களை ஒன்றிய அரசு நியமித்தது. இந்திய புள்ளியியல் சேவையைச் சேர்ந்த 1998ஆம் ஆண்டு பிரிவு அதிகாரி அனுஜா பாபத் மற்றும் இந்திய வருவாய் சேவையைச் சேர்ந்த (சுங்கம் மற்றும் மறைமுக வரிகள்) 2004ஆம் ஆண்டு பிரிவு அதிகாரி ருச்சிதா விஜ் ஆகியோர் தேசிய தேர்வு முகமையின் புதிய இணைச் செயலாளர்களாக 5 ஆண்டுகளுக்குப் பணியாற்றுவார்கள் என்று பணியாளர் அமைச்சகம் வெளியிட்ட ஓர் உத்தரவில் தெரிவிக்கப்பட்டுள்ளது.
இந்திய வருவாய் சேவையைச் சேர்ந்த (வருமான வரி) அதிகாரி ஆகாஷ் ஜெயின் மற்றும் இந்திய தணிக்கை மற்றும் கணக்கு சேவையைச் சேர்ந்த அதிகாரி ஆதித்யா ராஜேந்திர போஜ்காதியா ஆகியோர் தேசிய தேர்வு முகமையின் இணை இயக்குநர்களாக நியமிக்கப்பட்டுள்ளனர் என்று அந்த அமைச்சகம் மற்றொரு தனி உத்தரவில் குறிப்பிட்டுள்ளது.
