இந்திய ஆன்மிக மரபில் காலத்தை வென்ற தெய்வமாக போற்றப்படுபவர் அனுமன். நித்ய சிரஞ்சீவியாக கருதப்படும் அவர், இன்றும் சூட்சும வடிவில் உலகில் இருந்து பக்தர்களை காக்கிறார் என்பது பரம்பரையாக நிலவும் நம்பிக்கை. “ஸ்ரீராமஜெயம்” என்ற ஓர் எளிய நாமத்தை உச்சரித்தாலே அவரது அருள் கிட்டும் என்ற உணர்வு, கோடிக் கணக்கான பக்தர்களின் உள்ளங்களில் உறைந்திருக்கிறது.

வீரம், துணிவு, தன்னலமற்ற சேவை, அசைக்க முடியாத பக்தி-இவ்வனைத்திற்கும் உயிரோவியமாக விளங்குபவர் அனுமன். ராமர் மற்றும் சீதா ஆகியோரின் இதிகாச வரலாற்றில், பிரிந்த இரு இதயங்களை இணைத்த தூதராகவும், தர்மயுத்தத்தில் வெற்றிக்குத் துணைநின்ற வீரராகவும் அவர் திகழ்ந்தார். அதனால்தான், வாழ்க்கைப் போராட்டங்களில் வெற்றி வேண்டி அவரை நாடுகின்றனர் பக்தர்கள்.

சனி பகவானின் பாதக பலன்களிலிருந்து காப்பவர் என்றும், தீய சக்திகளை அணுக விடாத காவல் தெய்வம் என்றும் அனுமன் போற்றப்படுகிறார். அவரை மனமுருகி வேண்டுவோருக்கு துன்பங்கள் விலகி, மனஅமைதி நிலை பெறும் என்பது பக்த அனுபவங்களின் சாட்சியம்.அனுமனை வழிபடுவது என்பது வெறும் சடங்கல்ல; அது ஒரு நம்பிக்கையின் வெளிப்பாடு. உடல் வலிமை, மன உறுதி, கல்வி முன்னேற்றம், தொழில் வளர்ச்சி, குடும்ப நலம்-இவற்றை நாடி ஏராளமானோர் ஆஞ்சநேயரை நாடுகின்றனர். அனுமன் காயத்ரி ஜபம், வடைமாலை சமர்ப்பித்தல், வெண்ணெய் நைவேத்தியம், துளசி மாலை அர்ப்பணம் போன்ற வழிபாட்டு முறைகள் பக்தி மரபில் சிறப்பிடம் பெற்றவை.

செவ்வாய், வியாழன், சனிக்கிழமைகள் அனுமன் வழிபாட்டிற்கு விசேஷமானவை எனக் கருதப்படுகின்றன. ஆனாலும் உண்மையான பக்திக்கு எல்லா நாளும் ஏற்ற நாளே. முருகனுக்கு வேல் எப்படிப் பிரதானமோ, அனுமனுக்கு வால் அதுபோல புனிதச் சின்னமாக கருதப்படுகிறது. வாலில் சந்தனம், குங்குமம் பூசி வழிபடுவது பக்தர்களின் உறுதியான மரபாகும்.

இன்றைய வேகமான உலகில், மனஅழுத்தம் மற்றும் சவால்கள் நிறைந்த வாழ்க்கையில், அனுமன் நமக்கு தரும் மிகப்பெரிய பாடம்-பக்தியுடன் கூடிய செயலாற்றல். தன்னலமற்ற சேவை, அச்சமற்ற துணிவு, கடமை உணர்வு ஆகியவற்றை வாழ்க்கையில் நிறைவேற்றினால், வெற்றி நிச்சயம் என்பதே அனுமன் தரும் ஆன்மிகச் செய்தி.அனுமனை நினைக்கும் நொடியே நம்பிக்கை பிறக்கிறது; நம்பிக்கை பிறக்கும் இடத்தில் வெற்றியும் உதயமாகிறது.

ரமணி அண்ணா