நாமக்கல், அக்.16: 30 அம்ச கோரிக்கைகளை வலியுறுத்தி, நாமக்கல் மாவட்டம் முழுவதும் 32 கடைகளை அடைத்து ரேஷன் கடை ஊழியர்கள் ஆர்ப்பாட்டத்தில் ஈடுபட்டனர்.நாமக்கல்லில், தமிழ்நாடு அரசு ரேஷன் கடை பணியாளர் சங்கத்தினர், 30 அம்ச கோரிக்கைகளை வலியுறுத்தி நேற்று ஆர்ப்பாட்டத்தில் ஈடுபட்டனர். ஆர்ப்பாட்டத்திற்கு சங்கத்தலைவர் மனோகரன் தலைமை வகித்தார். நுகர்பொருள் வாணிப கழக பணியாளர்களுக்கு இணையான சம்பளம் வழங்க வேண்டும். ஓய்வூதியம் வழங்க வேண்டும். அனைத்து விற்பனையாளர்களுக்கும் ஒரே மாதிரியான போனஸ் வழங்க வேண்டும் என்பன உள்ளிட்ட கோரிக்கைகளை வலியுறுத்தி கோஷங்கள் எழுப்பப்பட்டன. இதில் துணைத்தலைவர் தண்டபாணி, செயலாளர் மூர்த்தி உள்ளிட்டோர் கலந்து கொண்டனர். ரேஷன்கடை ஊழியர்களின் வேலைநிறுத்தம் காரணமாக, நேற்று மாவட்டம் முழுவதும் 32 கடைகள் அடைக்கப்பட்டிருந்தன. மீதமுள்ள 700க்கும் மேற்பட்ட கடைகள் வழக்கம் போல செயல்பட்டதாக கூட்டுறவுத்துறை அதிகாரிகள் தெரிவித்தனர். நாமக்கல் மாவட்டத்தில், ரேஷன் கடையில் பணியாற்றும் ஊழியர்கள் 3 சங்கமாக பிரிந்து கிடக்கிறார்கள். இதனால், நேற்று ஒரு சங்கத்தினர் போராட்டம் நடத்தினாலும், பெரும்பாலான கடைகள் வழக்கம் போல இயங்கின.