ஆலங்குடி, செப்.18: ஆலங்குடி அடுத்த கொத்தக்கோட்டை ஊராட்சிக்குட்பட்ட தோப்புப்பட்டியை சேர்ந்தவர் முத்தையா (62). நெடுஞ்சாலை துறையில் வரைவுரையாளராக பணிபுரிந்து ஓய்வு பெற்றவர். இவருக்கு ஒரு மகன், ஒரு மகள் உள்ளனர். இந்நிலையில், இவரது வீட்டருகே உள்ளவருக்கும் இவருக்கும் அடிக்கடி இடப்பிரச்னை இருந்து வந்தது. இதனால் மனமுடைந்த முத்தையா நேற்று தனது வீட்டு அருகே இருந்த மரத்தில் தூக்கிட்டு தற்கொலை செய்து கொண்டார். ஆலங்குடி போலீசார், உடலை மீட்டு மருத்துவ கல்லூரி மருத்துவமனைக்கு அனுப்பி வைத்தனர். இந்நிலையில், முத்தையாவின் உறவினர்கள் அவர் தூக்கில் இறந்த இடத்திலேயே அடக்கம் செய்வோம் என்றுக்கூறி முத்தையாவின் உடலை வாங்க மறுத்தனர். இதனைத் தொடர்ந்து, ஆலங்குடி தாசில்தார் ரெத்தினாவதி, இன்ஸ்பெக்டர் வைத்தியநாதன் ஆகியோர் முத்தையாவின் குடும்பத்தினர் மற்றும் உறவினர்களிடம் பேச்சுவார்த்தையில் ஈடுபட்டனர். இதில் உடன்பாடு ஏற்பட்டதையடுத்து அவரது குடும்பத்தினர் மற்றும் உறவினர்கள் முத்தையாவின் உடலை அடக்கம் செய்தனர். ஆலங்குடி போலீசார் வழக்கு பதிவு செய்து விசாரிக்கின்றனர்.