*அதிகாரிகளுக்கு கலெக்டர் உத்தரவு

சித்தூர் : சித்தூர் மாவட்டத்தில் மாம்பழம் பயிரிட்ட ஒவ்வொரு விவசாயியின் விவரங்களும் களஅளவில் ஆய்வு செய்யப்பட வேண்டும் என அதிகாரிகளுக்கு கலெக்டர் உத்தரவிட்டார்.சித்தூர் கலெக்டர் அலுவலகத்தில் மாவட்ட வேளாண்துறை மற்றும் பஞ்சாயத்து ராஜ் உள்ளிட்ட பல்வேறு துறைகளை சேர்ந்த அதிகாரிகளுடன் கலெக்டர் சுமித்குமார் தலைமையில் நேற்று ஆய்வு கூட்டம் நடந்தது. இதில் கலெக்டர் பேசியதாவது:

பயிர்கள் குறித்த பரவலான விழிப்புணர்வு நிகழ்ச்சிகளையும், தோட்டக்கலை பயிர்களுக்காக விவசாயிகளுக்கு வழங்கப்படும் மானியங்கள் குறித்த விழிப்புணர்வு நிகழ்ச்சிகளை அதிகாரிகள் நடத்த வேண்டும். மாம்பழ கொள்முதலின் முன்னேற்றம், இந்த பயிரை பதிவு செய்ய அரசு வழங்கும் மானியம் மற்றும் தகுதியான விவசாயிகளை அடையாளம் காண்பது குறித்து வேளாண்மை, தோட்டக்கலை மற்றும் சந்தைப்படுத்தல் துறையின் அதிகாரிகள் பணியில் ஈடுபட வேண்டும்.

தகுதியுள்ள ஒவ்வொரு விவசாயிக்கும் அரசாங்கத்தால் வழங்கப்படும் மானியம் வெளிப்படையானதாகவும், உண்மையான பயனாளிகளை சென்றடைவதையும் உறுதி செய்வதற்காக, ஒவ்வொரு விண்ணப்பமும் கள அளவில் ஆய்வு செய்யப்பட வேண்டும்.

ஒவ்வொரு கிராமத்திலும் மாம்பழம் பயிரிட்டுள்ள விவசாயிகளை அடையாளம் காண, வேளாண்மை மற்றும் தோட்டக்கலைத் துறை அதிகாரிகள் மற்றும் ரைத்து சேவா கேந்திரா பணியாளர்களைக் கொண்டு மண்டல அளவில் கூட்டுக்குழுக்கள் அமைக்கப்பட வேண்டும்.

மாம்பழப் பயிர் தொடர்பான ஒவ்வொரு பதிவும் மின்-பயிர் விவரங்களுடன் ஒப்பிடப்பட வேண்டும். தேவைப்படும் இடங்களில் கள ஆய்வு நடத்தப்பட வேண்டும். மின்-பயிர் பதிவை மட்டும் நம்பியிருக்காமல், பயிர் உண்மையில் உள்ளதா? என்பதை களஅளவிலும் உறுதி செய்ய வேண்டும். மின்-பயிரில் பதிவு இல்லாமல், ஆனால் மாம்பழப் பயிர் இருந்தால், சம்பந்தப்பட்ட விதிகளின்படி மின்-பயிர் பதிவை முடித்து, தகுதியை உறுதி செய்ய வேண்டும். சொட்டு நீர்ப்பாசனம், பயிர் காப்பீடு, தக்காளி, களை தடுப்பு விரிப்பு உள்ளிட்டவைகளை அதிகாரிகள் ஆய்வு செய்ய வேண்டும்.

வங்கிகளிடமிருந்து கடன் பெற்ற விவசாயிகள், வங்கி மூலமாகவே காப்பீட்டில் பதிவு செய்யப்படுவார்கள். மேலும், வங்கிகளிடமிருந்து கடன் பெறாத அனைத்து விவசாயிகளும் வானிலை அடிப்படையிலான பயிர் காப்பீட்டு திட்டத்தில் பதிவு செய்யப்படுவதை உறுதிசெய்ய அதிகாரிகள் நடவடிக்கை எடுக்க வேண்டும். பிரதம மந்திரி பைசல் பீமா யோஜனா திட்டத்தின் கீழ், மாவட்டத்தில் உள்ள தகுதியுள்ள அனைத்து விவசாயிகளும் பயிர் காப்பீட்டுத் திட்டத்தில் பதிவு செய்யப்படுவதை உறுதிசெய்ய நடவடிக்கை எடுக்க வேண்டும்.

அதுவே அவர்களின் வாழ்வாதாரமும் ஆகும். எல்-நினோவின் தாக்கம் குறித்து விவசாயிகளுக்கு பரவலான விழிப்புணர்வு நிகழ்ச்சிகள் ஏற்பாடு செய்யப்பட வேண்டும். இவ்வாறு அவர் பேசினார்.இதில் மாவட்ட வேளாண்மை அதிகாரி முரளி, மாவட்ட தோட்டக்கலை அதிகாரி சதீஷ், சந்தைப்படுத்தல் துறை பரமேஸ்வரன், ஒருங்கிணைப்பு அதிகாரி கோட்டேஸ்வர ராவ், மற்றும் பஞ்சாயத்து ராஜ் துறை சேர்ந்த அதிகாரிகள் பலர் கலந்து கொண்டனர்.

மறுசீரமைக்கப்பட்ட வானிலை அடிப்படையில் பயிர் காப்பீடு

சாதகமற்ற வானிலை மாற்றங்களால் ஏற்படும் பயிர் இழப்புகளிலிருந்து விவசாயிகளைப் பாதுகாக்க, மத்திய மற்றும் மாநில அரசுகள் மறுசீரமைக்கப்பட்ட வானிலை அடிப்படையிலான பயிர் காப்பீட்டுத் திட்டத்தைச் செயல்படுத்த நடவடிக்கை எடுக்க வேண்டும். விவசாய நிலம் வைத்திருக்கும் விவசாயிகள் மற்றும் குத்தகைதாரர்கள் இத்திட்டத்திற்குத் தகுதியுடையவர்கள்.

அவர்கள் ஆதார் அட்டை, வங்கிக் கணக்குப் புத்தகம், நிலக் கணக்குப் புத்தகத்தின் நகல்கள், பயிர் நடப்பட்டதை உறுதிப்படுத்தும் சான்றிதழ் அல்லது ஆதார் இணைக்கப்பட்ட வங்கிக் கணக்கின் சுய சான்றிதழ், நில விவரங்கள் மற்றும் பிற தேவையான ஆவணங்களுடன், ஆன்லைனில் அல்லது பயிர் காப்பீட்டு செயலி மூலமாக அருகிலுள்ள பொதுச்சேவை மையம் மற்றும் பயிர் காப்பீட்டு இணையதளத்தில் உள்ள வேளாண் காப்பீட்டுப் பிரதிநிதி மூலமாகப் பதிவு செய்து கொள்ள அதிகாரிகள் விவசாயிகளுக்கு அறிவுறுத்த வேண்டும் என கலெக்டர் தெரிவித்தார்.