மான்செஸ்டர்: 12 அணிகள் பங்கேற்றுள்ள 10வது ஐசிசி மகளிர் டி.20 உலக கோப்பை கிரிக்கெட் தொடர் இங்கிலாந்தில் நடந்து வருகிறது. இதில் மான்செஸ்டரில் நாளை இரவு 7 மணிக்கு நடைபெறும் 23வது லீக் போட்டியில் குரூப் 1 பிரிவில் இந்தியா-வங்கதேசத்துடன் மோதுகிறது. முதல் போட்டியில் பாகிஸ்தான், 2வது போட்டியில் நெதர்லாந்தை வீழ்த்திய இந்தியா, 3வது போட்டியில் தென்ஆப்ரிக்காவிடம் தோல்வி அடைந்தது. இதனால் எஞ்சிய 2 போட்டியிலும் வென்றால் மட்டுமே அரையிறுதிக்கு தகுதிபெற முடியும் என்ற நெருக்கடியில் இன்று களம் இறங்குகிறது. பேட்டிங்கில் ஸ்மிருதி மந்தனா 159 ரன் எடுத்து 2வது இடத்தில் உள்ளார். பவுலிங்கில் சரணி 10 விக்கெட் எடுத்து டாப்பில் இருக்கிறார்.
மற்ற யாரும் பெரிதாக சாதிக்கவில்லை. மறுபுறம் வங்கதேசம் 3போட்டியில் 2 வெற்றி, ஒரு தோல்வி என 4 புள்ளிகளுடன் 4வது இடத்திலும் உள்ளது. மீதமுள்ள 2போட்டியிலும் வென்றால் மட்டுமே அரையிறுதி என்ற நிலையில் தான் அந்த அணியும் உள்ளது.நேருக்கு நேர்: இரு அணிகளும் இதற்கு முன் 23 முறை டி.20 போட்டியில் நேருக்கு நேர் மோதி உள்ளன. இதில் 20ல் இந்தியா, 3ல் வங்கதேசம் வென்றுள்ளது. கடைசியாக மோதிய 7 போட்டியிலும் இந்தியா தான் வென்றுள்ளது. உலக கோப்பையில் இதற்கு முன் மோதிய 3 போட்டியிலும் இந்தியா தான் வென்றுள்ளது குறிப்பிடத்தக்கது.
