கிருஷ்ணகிரி, டிச.29: கிருஷ்ணகிரி மாவட்டத்தில் நாளை (30ம்தேதி) உள்ளாட்சி தேர்தலுக்கான இரண்டாம் கட்ட வாக்குப்பதிவு நடைபெறவுள்ளது. இதில் 5 லட்சத்து 96 ஆயிரத்து 566 பேர் வாக்களிக்க ஏற்பாடுகள் செய்யப்பட்டுள்ளது. கிருஷ்ணகிரி மாவட்டத்தில் ஊரக உள்ளாட்சி தேர்தல் 2 கட்டங்களாக நடைபெறுகிறது. முதற்கட்ட தேர்தல் நேற்று முன்தினம் முடிவடைந்தது. நாளை(30ம்தேதி) இரண்டாம் கட்ட தேர்தல் கிருஷ்ணகிரி, பர்கூர், வேப்பனஹள்ளி, சூளகிரி, கெலமங்கலம் ஒன்றியங்களில் நடைபெறுகிறது. இதனையொட்டி, வேட்பாளர்களின் பிரசாரம் நேற்று மாலை 5 மணிவுடன் நிறைவடைந்தது. இரண்டாம் கட்ட தேர்தலுக்காக 5 ஒன்றியங்களிலும் 1046 வாக்குச்சாவடிகள் அமைக்கப்பட்டுள்ளது. இதில், 5 லட்சத்து 96 ஆயிரத்து 566 வாக்காளர்கள் வாக்களிக்க உள்ளனர். இந்த தேர்தலில் மாவட்ட ஊராட்சிக்குழு உறுப்பினர், ஊராட்சி ஒன்றியக்குழு உறுப்பினர், ஊராட்சி மன்ற தலைவர் மற்றும் ஊராட்சி வார்டு உறுப்பினர் ஆகிய 4 பதவிகளுக்கு தேர்தல் நடைபெறுகிறது. இதற்காக, 4 விதமான வாக்குச்சீட்டுகளில் வாக்காளர்கள் வாக்களிக்க வேண்டும். ஊராட்சி தேர்தலுக்காக 23 தேர்தல் நடத்தும் அலுவலர்களும் 456 உதவி தேர்தல் நடத்தும் அலுவலர்களும், ஒவ்வொரு வாக்குச்சாவடிக்கு 7 அல்லது 8 அலுவலர்கள் வீதம் சுமார் 8317 அலுவலர்கள் வாக்குப்பதிவு பணியில் ஈடுபட்டுள்ளனர்.