புதுச்சேரி, நவ. 28: பாஜக பந்த் போராட்டத்தின்போது சுற்றுலா வாகனங்களை உடைத்தவர்களை கைது செய்ய வலியுறுத்தி ஏஐடியுசி தொழிற்சங்கத்தினர் காவல் நிலையத்தை முற்றுகையிட்டு வாக்குவாதத்தில் ஈடுபட்டதால் பரபரப்பு ஏற்பட்டது. கேரளாவில் சபரிமலை ஐயப்பன் கோயிலில் ஆகம விதிகளுக்கு எதிராகவும், அதன் புகழுக்கு களங்கம் விளைவிக்கும் வகையிலும் கேரள அரசு செயல்படுவதாககூறி புதுவையில் பாஜகவினர் நேற்றுமுன்தினம் ஒருநாள் முழுஅடைப்பு போராட்டத்தில் ஈடுபட்டனர். அன்றைய தினம் அதிகாலையில் இசிஆரில் நிறுத்தப்பட்டிருந்த 13க்கும் மேற்பட்ட வாகனங்கள் அடித்து உடைக்கப்பட்டன. இதில் 2 வாகனங்களுக்கு மட்டும் வழக்குபதிவு செய்யப்பட்டது.மீதமுள்ள வாகனங்களை உடைத்தவர்கள் மீது வழக்குபதிவு செய்யவில்லை. இந்நிலையில் நேற்று காலை வாகன உரிமையாளர்கள் லாஸ்பேட்டை காவல் நிலையத்தை முற்றுகையிட்டு போராட்டத்தில் ஈடுபட்டனர். ஏஐடியுசி பொதுச்செயலாளர் சேதுசெல்வம் தலைமை தாங்கினார். தலைவர் தினேஷ் பொன்னையா, துணைத் தலைவர்கள் முருகன், சந்திரசேகரன், இந்திய கம்யூனிஸ்ட் கட்சி பொருளாளர் சுப்பையா, செயலாளர் ரவிச்சந்திரன், சுற்றுலா வாகன நிர்வாகிகள் தமிழ், தேவா, நூர்முகமது உள்ளிட்டோர் கலந்து கொண்டனர்.