சான் ஜுவான்: 2021ம் ஆண்டிற்கான உலக அழகியாக போலந்து நாட்டை சேர்ந்த கரோலினா பைலாவ்ஸ்கா மகுடம் சூடியிருக்கிறார். போர்ட்டோரிகோ தலைநகர் சான் ஜுவான் உள்ள கோகோ கோலா அரங்கில் 70வது உலக அழகி போட்டி கோலாகலமாக நடைபெற்றது. 97 நாடுகளை சேர்ந்த அழகிகள் கலந்துக்கொண்டு பல்வேறு பிரிவுகளில் திறமைகளை வெளிப்படுத்தினர். இந்தியா சார்பில் ஹைதராபாத்தை சேர்ந்த மானசா வாரணாசி போட்டியிட்டார். அவரால் டாப் 13 வரை மட்டுமே செல்ல முடிந்தது. இறுதி சுற்றில் போலந்து நாட்டை சேர்ந்த 23 வயதான கரோலினா உலக அழகியாக தேர்வு செய்யப்பட்டார். அவருக்கு கடந்த முறை உலக அழகி பட்டம் வென்ற டோனி ஆன்சிங் மகுடம் சூட்டினார்.