காரைக்குடி: காரைக்குடி நகராட்சியில் பிரசாரம் செய்ய நட்சத்திர பேச்சாளர்கள் வராத நிலையில், பூத்தில் பணியாற்றுபவர்களுக்கு பிரியாணி பொட்டலம் வாங்கக் கூட காசு தரவில்லை என அதிமுக வேட்பாளர்கள் புலம்புகின்றனர்.சிவகங்கை மாவட்டம், காரைக்குடி நகராட்சியின் 36 வார்டு உறுப்பினர் பதவிக்கு 231 பேர் போட்டியிடுகின்றனர். இதில் திமுக 26, காங்கிரஸ் 9, கம்யூனிஸ்ட் 1, அதிமுக 32, பாஜ 13 இடங்கள் போட்டியிடுகின்றன. திமுக கூட்டணி வேட்பாளர்களை ஆதரித்து முன்னாள் நிதி அமைச்சர் ப.சிதம்பரம், அமைச்சர் கேஆர்.பெரியகருப்பன், முன்னாள் அமைச்சர் தென்னவன் மற்றும் நட்சத்திர பேச்சாளர்கள் பிரசாரம் செய்தனர். ஆனால் அதிமுக வேட்பாளர்களுக்கு நட்சத்திர பேச்சாளர்கள் யாரும் பிரசாரம் செய்ய கூட வரவில்லை. கட்சியின் சார்பில் பணம் வழங்கப்படும் என வேட்பாளர்கள் எதிர்பார்த்த நிலையில், அதற்கும் கைவிரித்ததால் பிரசாரத்தில் தீவிரம் காட்டாமல் சுணக்கமான நிலையே தொடர்ந்தது.