மெல்போர்ன்: இந்த ஆண்டு முடிவடையவுள்ள நிலையில் டென்னிஸ் ஏடிபி தரவரிசை பட்டியலில் நோவாக் ஜோகோவிச் முதலிடத்தை தக்க வைத்துக் கொண்டுள்ளார். இந்த ஆண்டு துவக்கத்தில் தரவரிசையில் 2ம் இடத்தில் இருந்த ரஃபேல் நடால் தற்போது, 6ம் இடத்திற்கு இறங்கியுள்ளார். இவர்கள் இருவரை தவிர முதல் 10 இடங்களில் 8 இடங்களை இளம் வீரர்கள் பிடித்து, அசத்தியுள்ளனர். தொடர்ந்து இந்த ஆண்டும் முதலிடத்தில் நீடிக்கும் செர்பியாவின் டென்னிஸ் நட்சத்திரம் நோவாக் ஜோகோவிச்சுக்கு தற்போது 34 வயது. 6ம் இடத்தில் ரஃபேல் நடாலுக்கு தற்போது 35 வயது. தரவரிசையில் முதல் 10 இடங்களில் உள்ள வீரர்களில் மிகவும் இளைய வீரர் என்ற பெருமையை 20 வயதேயான இத்தாலியின் ஜான்னிக் சின்னர் பிடித்துள்ளார். கடந்த 2008ம் ஆண்டு அர்ஜென்டினாவின் ஜுவான் மார்ட்டின் டெல் போட்ரோ, அப்போது 20வது வயதில் ஏடிபி தரவரிசையில் 10ம் இடத்தை பிடித்தார்.