பெங்களூரு: சிக்கமகளூருவில் கடந்த 3 நாட்கள் பெய்த மழையில் காபி செடிகள் மற்றும் நெற்பயிர்கள் சேதமடைந்திருப்பதால் 5 தனிப்படை அமைத்து ஆய்வு நடத்த மாவட்ட கலெக்டர் பகாதி கவுதம் உத்தரவிட்டுள்ளார். மலைநாடு மாவட்டமான சிக்கமகளூருவில் ஏராளமான காபி தோட்டங்கள் உள்ளன. ஒரு சில இடங்களில் நெற்பயிர்களும் விளைவிக்கப்பட்டு வருகிறது. விரைவில் அறுவடை செய்ய உள்ள நிலையில், கடந்த 3 நாட்களாக மழை பெய்து அனைத்து பயிர்களும் சேதமடைந்துள்ளது. இதனால் விவசாயிகள் மற்றும் தோட்ட உரிமையாளர்கள் மிகவும் பாதிக்கப்பட்டுள்ளனர். மேலும் இது தொடர்பாக நடவடிக்கை எடுத்து உரிய நிவாரணம் வழங்கவேண்டுமென்று அவர்கள் தரப்பில் வேளாண் மற்றும் தோட்டக்கலைத்துறைக்கு கோரிக்கை வைக்கப்பட்டிருந்தது.