தங்கவயல்: கடந்த சில மாதங்களாக தங்கவயலை சுற்றிலும் உள்ள கிராமங்களின் விவசாய நிலங்களில் காட்டு யானைகள் தொடர்ந்து படையெடுத்து விவசாய பயிர்களை நாசம் செய்து வருகிறது. தற்போது 13 யானைகள் அடங்கிய காட்டு யானை கூட்டம் தங்கவயல் அடுத்த கண்ணூர் கிராமம் அருகே முகாமிட்டு உள்ளன. தங்கவயலின் தென்மேற்கில் தமிழக மாநிலம், கிருஷ்ணகிரி மாவட்ட வேப்பனபள்ளி காட்டு பகுதியும், கிழக்கில் ஆந்திர மாநில வி.கோட்டா அடுத்த காட்டு பகுதியும் உள்ளது. ஒவ்வொரு வருடமும் ஆந்திர மாநில காட்டு பகுதியில் இருந்து உணவையும், தண்ணீரையும் தேடி அதன் வழக்கமான வழி தடத்தில் வரும் யானை கூட்டம் பேத்தமங்கலம் வரை வந்து அங்குள்ள விவசாய நிலங்களில் புகுந்து விடும். அதே போல் தமிழக கிருஷ்ணகிரி வனப்பகுதியில் இருந்து வரும் யானை கூட்டம் பங்காருபேட்டையை அடுத்த கிராமங்கள் வரை வரும். அவ்வப்போது பலரும் இந்த யானை கூட்டத்திடம் சிக்கி மிதிப்பட்டு உயிர் பலியாகியுள்ளனர்.