புதுடெல்லி: ‘‘நாடாளுமன்றத்தில் நிறைவேற்றப்பட்ட சட்டங்களை அமல்படுத்துவது மாநிலங்களின் அரசியலமைப்பு கடமையாகும்,’’ என்று மத்திய சட்டத்துறை அமைச்சர் ரவிசங்கர் பிரசாத் தெரிவித்தார். பாகிஸ்தான், ஆப்கானிஸ்தான், வங்கதேசத்தில் இருந்து இந்தியாவுக்கு அகதிகளாக வந்துள்ள முஸ்லிம் அல்லாதவர்களுக்கு குடியுரிமை வழங்கும் குடியுரிமை திருத்த சட்டத்துக்கு எதிராக நாடெங்கும் போராட்டம் தீவிரம் அடைந்துள்ளது. இந்த சட்டத்தை வாபஸ் பெற மத்திய அரசை வலியுறுத்தி, கேரள சட்டப்பேரவையில் நேற்று முன்தினம் தீர்மானம் நிறைவேற்றப்பட்டது. இதேபோல் மேற்கு வங்கம், பீகார், மத்திய பிரதேசம், ராஜஸ்தான் போன்ற மாநில அரசுகளும் குடியுரிமை திருத்த சட்டத்தை அமல்படுத்த மாட்டோம் என்று தெரிவித்துள்ளன.