சுசீந்திரம்: சுசீந்திரம் தாணுமாலய சுவாமி கோயில் வளாகத்தில் 18 அடி உயர ஆஞ்சநேயர் விக்ரகம் உள்ளது. ஆண்டுதோறும் ஆஞ்சநேயர் ஜெயந்தி விழா இங்கு விமரிசையாக கொண்டாடப்படுவது வழக்கம். இந்த ஆண்டின் ஆஞ்சநேயர் ஜெயந்தி விழா நேற்று நடந்தது. இதையொட்டி நேற்று காலை 5 மணிக்கு ஸ்ரீராமருக்கு அபிஷேகம், 8 மணிக்கு ஆஞ்சநேயர் சுவாமிக்கு நல்லெண்ணெய், மஞ்சள், அரிசி மாவு, நெய், இளநீர், பன்னீர், பால், தயிர், தேன், பஞ்சாமிர்தம், கரும்புச்சாறு, எலுமிச்சம் சாறு, விபூதி, குங்குமம், களபம், சந்தனம் ஆகிய 16 வகையான பொருட்களால் சோடஷ அபிஷேகம் நடந்தது. பின்னர் அன்னதானம் வழங்கப்பட்டது. பகல் 12 மணிக்கு அலங்கரிக்கப்பட்ட ஆஞ்சநேயருக்கு சிறப்பு தீபாராதனை நடந்தது. மாலை 6 மணிக்கு ராமருக்கு புஷ்பாபிஷேகம், 7 மணிக்கு வாடாமல்லி, கிரேந்தி நீங்கலாக மல்லிகை, ரோஜா உள்ளிட்ட வாசனை மலர்களால் ஆஞ்சநேயர் சுவாமியின் கழுத்து வரை புஷ்பாபிஷேகம் நடந்தது.