- ரஜினி
- கமல்
- சென்னை
- ரஜினிகாந்த்
- கமல்ஹாசன்
- சிபி சக்ரவர்த்தி
- சிவகார்த்திகேயன்
- சிவப்பு இராட்சத திரைப்படங்கள்
- நெல்சன் திலீப் குமார்
சென்னை: கமல்ஹாசன் தயாரிப்பில் ரஜினிகாந்த் தனது 173வது படத்தில் நடிக்கிறார். இதை சிவகார்த்திகேயன் நடிப்பில் வெளியான ‘டான்’ என்ற படத்தை இயக்கிய சிபி சக்கரவர்த்தி எழுதி இயக்குகிறார். இதையடுத்து ரெட் ஜெயண்ட் மூவிஸ் தயாரிக்கும் புதிய படத்தில் ரஜினிகாந்த், கமல்ஹாசன் இணைந்து நடிக்கின்றனர். இதன் அறிவிப்பு நேற்று முன்தினம் வெளியானது. கடந்த 1981ல் வெளியான ‘தில்லு முல்லு’ என்ற படத்துக்கு பிறகு 46 வருடங்கள் கழித்து ரஜினிகாந்த், கமல்ஹாசன் மீண்டும் இணைந்து நடிக்கின்றனர்.
நெல்சல் திலீப்குமார் இயக்குகிறார். அனிருத் இசையமைக்கிறார். ராஜீவ் மேனன் ஒளிப்பதிவு செய்கிறார். இப்படத்தின் புரமோ வீடியோ நேற்று பிற்பகல் 12.07 மணிக்கு வெளியானது. இந்த புரமோ வீடியோவில் கமல்ஹாசனிடம் இரு ஜாக்கெட்கள் காட்டப்படுகிறது. அதில் ஒன்றை அவர் தேர்வு செய்ய, அதை ஏற்கனவே ரஜினிகாந்த் தேர்வு செய்துவிட்டார் என இயக்குனர் நெல்சன் சொல்கிறார்.
அதேபோல் ரஜினிகாந்திடம் இரண்டு வாட்ச்கள் காட்டப்படுகிறது. அதில் ஒன்றை ரஜினி தேர்வு செய்ய, அதை ஏற்கனவே கமல் எடுத்திருக்கிறார் என்கிறார். பிறகு முழுமையாக ரெடியாகி ரஜினி, கமல் இருவரும் இரண்டு ரூம்களிலிருந்து வெளிய வருகிறார்கள். பிறகு அங்கிருக்கும் கார் ஷெட்டுக்கு செல்கிறார்கள். கார்களை சுத்தப்படுத்தி வரும் இளம்பெண்கள், இருவரையும் பார்த்து மெய்மறந்து போக, இருவரும் ஸ்டைலாக ஒரு காருக்குள் அமருகிறார்கள்.
பின் சீட்டில் நெல்சன், அனிருத் அமர்ந்திருக்கிறார்கள். நெல்சனை பார்த்து, ‘இதுல யார் ஹீரோ’ என டிரைவர் சீட்டில் இருக்கும் கமல் கேட்கிறார். ‘கேட்கிறாரு இல்ல, சொல்லுங்க’ என ரஜினியும் உசுப்பேத்திவிட, நெல்சன் முழிக்கிறார். கார் பறக்கிறது. அத்துடன் புரமோ முடிகிறது. படப்பிடிப்பு விரைவில் தொடங்கும் என தெரிவிக்கப்பட்டுள்ளது. இந்த புரமோ வெளியானதும் இணையதளத்தில் வைரலானது.
* இது 18வது முறை
‘அபூர்வ ராகங்கள்’, ‘அந்துலேனி கதா’ (தெலுங்கு), ‘மூன்று முடிச்சு’, ‘அவர்கள்’, ‘16 வயதினிலே’, ‘ஆடு புலி ஆட்டம்’, ‘இளமை ஊஞ்சலாடுகிறது’, ‘வயசு பிலிச்சிந்தி’ (தெலுங்கு), ‘தப்புத் தாளங்கள்’, ‘அவள் அப்படித்தான்’, ‘அலாவுதீனும் அற்புத விளக்கும்’, ‘நினைத்தாலே இனிக்கும்’, ‘தாயில்லாமல் நானில்லை’, ‘நட்சத்திரம்’, ‘தில்லு முல்லு’, ‘உருவங்கள் மாறலாம்’, ‘கிரஃப்தார்’ (இந்தி), இப்போது 18வது படத்தில் இணைந்துள்ளனர்.
* 12:07 ஏன்?
46 வருடங்களுக்கு பிறகு மீண்டும் ரஜினிகாந்த், கமல்ஹாசன் இணைந்து நடிக்கும் படத்தின் புரமோ மற்றும் அறிவிப்புகளை தொடர்ந்து 12: 07 மணிக்கு வெளியிடுவது ஏன் என்று ரசிகர்கள் மத்தியில் கேட்கப்பட்டு வருகிறது. அதாவது, ரஜினிகாந்தின் பிறந்தநாள் டிசம்பர் மாதம் 12ம் தேதி, கமல்ஹாசனின் பிறந்தநாள் நவம்பர் மாதம் 7ம் தேதி என்பதால், அதை குறிக்கும் விதமாகவே 12: 07 மணியை படக்குழு தேர்வு செய்திருக்கிறது.
