ரூ.50 லட்சத்தை மறுத்துவிட்டு நடித்த டிஜே பானு

சென்னை: ஓசை பிலிம்ஸ் தயாரிக்க, இளையராஜா பாடல்கள் எழுதி இசை அமைத்துள்ள படம், ‘அந்தோனி’. இலங்கையில் போருக்கு பிறகான வாழ்வியல் பின்னணியில் உருவாகியுள்ள இதில் ‘கயல்’ வின்சென்ட், டிஜே பானு, நிழல்கள் ரவி, அருள்தாஸ், சுதர்சன், ஷாமி நடித்துள்ளனர். சுகிர்தன் கிறிஸ்துராஜா, ஜெனோசன் ராஜேஷ்வர் இயக்கியுள்ளனர். ரிஷி செல்வம் ஒளிப்பதிவு செய்ய, கலைவளரி சகா ரமணதாஸ், சுகந்தினி, விஜய் பாலசிங்கம், ஸ்ரீஸ்கந்தராஜா, விக்கி இணைந்து தயாரித்துள்ளனர்.

அடுத்த மாதம் திரைக்கு வரும் இப்படத்தின் இசை மற்றும் டிரைலர் வெளியீட்டு விழாவில் அகிலா பாலு மகேந்திரா, சீனு ராமசாமி, லெனின் பாரதி, ‘உலக சினிமா’ பாஸ்கரன் மற்றும் படக்குழுவினர் பங்கேற்றனர். அப்போது ‘கயல்’ வின்சென்ட் பேசுகையில், ‘ஹீரோயின் டிஜே பானு, 50 லட்ச ரூபாய் சம்பளம் கொடுத்து தெலுங்கு படத்தில் நடிக்க அழைத்தபோது, அதை மறுத்துவிட்டு இப்படத்தில் நடித்திருக்கிறார். உண்மையிலேயே அவரது அர்ப்பணிப்பு பாராட்டுக்குரியது’ என்றார்.