சென்னை: கருணை அடிப்படையில் பெண் வாரிசுகளுக்கு மட்டுமே அங்கன்வாடி வேலை வாய்ப்பு வழங்கப்படும் என்ற அரசானை இன்னும் அமலில்தான் உள்ளது என்று தமிழக அரசு சென்னை உயர் நீதிமன்றத்தில் தெரிவித்துள்ளது. அங்கன் வாடி ஊழியராக பணியாற்றிய தனது தாய் உயிரிழந்த நிலையில், கருணை அடிப்படையில், வேலை கேட்டு விழுப்புரத்தை சேர்ந்த விக்ரம் என்பவர் அரசுக்கு விண்ணப்பித்திருந்தார். கருணை அடிப்படையில் பெண் வாரிசுகளுக்கு மட்டுமே அங்கன்வாடி வேலை வாய்ப்பு வழங்கப்படும் என்ற அரசாணையை சுட்டிக்காட்டி விக்ரமின் மனு நிராகரிக்கபட்டது.

இதையடுத்து, கருணை அடிப்படையில் பெண் வாரிசுகளுக்கு மட்டுமே அங்கன்வாடி வேலை வாய்ப்பு வழங்கப்படும் என்ற அரசாணை ரத்து செய்யபட்டுள்ளால், தனக்கு வேலை வழங்க வேண்டும் என்று விக்ரம் சென்னை உயர் நீதிமன்றத்தில் வழக்கு தொடர்ந்தார். வழக்கை விசாரித்த உயர் நீதிமன்றம் விக்ரமிற்கு 8 வாரங்களில் பணி வழங்க வேண்டும் என்று உத்தரவிட்டது. இந்த உத்தரவை அமல்படுத்தவில்லை என்று விக்ரம் தாக்கல் செய்த நீதிமன்ற அவமதிப்பு வழக்கில் சமூக நலத்துறை செயலாளர் ஜெயஸ்ரீ முரளிதரன் நேரில் ஆஜராக உத்தரவிட்டிருந்தார்.

வழக்கு நீதிபதி ஆனந்த் வெங்கடேஷ் முன்பு விசாரணைக்கு வந்தது. அப்போது, சமூக நலத்துறை செயலாளர் ஜெயஸ்ரீ முரளிதரன் நேரில் ஆஜராகி இருந்தார். அப்போது, அரசு தரப்பில் கூடுதல் அட்வகேட் ஜெனரல் ஜெ.ரவீந்திரன் ஆஜராகி, அங்கன்வாடி பணியாளர்களாக கருணை அடிப்படையில் பெண் வாரிசுளுக்கு மட்டுமே பணி நியமனம் வழங்கப்படும் என்ற அரசாணையை ரத்து செய்த உத்தரவிற்கு உயர் நீதிமன்றம் தடை விதித்துள்ளதால், அரசாணை இன்னும் அமலில் உள்ளது என்று தெரிவித்தார்.

இதையடுத்து, மனுதாரரின் கோரிக்கை மீது எந்த உத்தரவும் பிறப்பிக்கவில்லை. சமூக நலத்துறை செயலாளர் தகுந்த உத்தரவை பிறப்பிக்க வேண்டும் என்று உத்தரவிட்டு விசாரணையை ஏப்ரல் 15ம் தேதிக்கு தள்ளிவைத்தார். மேலும், சமூக நலத்துறை செயலாளர் ஜெயஸ்ரீ முரளிதரன் அடுத்த விசாரணையின்போது நேரில் ஆஜராவதில் இருந்து விலக்கு அளித்தும் நீதிபதி உத்தரவிட்டார்.

The post கருணை அடிப்படையில் வேலை வாய்ப்பு; பெண் வாரிசுகளுக்கு மட்டும் வழங்கும் அரசாணை அமலில் உள்ளது: சென்னை உயர் நீதிமன்றத்தில் தமிழக அரசு தகவல் appeared first on Dinakaran.